لاہور: پنجاب میں الیکشن کے سلسلے میں گزشتہ روز سپریم کورٹ کا حکم آنے کے بعد لاہور ہائیکورٹ نے آج جمعرات کو توہین عدالت کی درخواست نمٹا دی۔
تفصیلات کے مطابق عدالتی احکامات کے باوجود پنجاب میں الیکشن کی تاریخ نہ دینے کے کیس میں لاہور ہائیکورٹ نے الیکشن کمیشن و دیگر کے خلاف توہین عدالت کی درخواست نمٹا دی۔
عدالت نے اپنے فیصلے میں کہا کہ سپریم کورٹ نے 90 روز میں الیکشن کرانے کا حکم دے دیا ہے، اب توہین عدالت کی درخواست کا جواز نہیں رہتا، عدالت نے درخواست گزار سے کہا کہ اب آپ درخواست پر زور نہ دیں اور واپس لے لیں۔
اظہر صدیق ایڈووکیٹ نے کہا کہ سپریم کورٹ کا فیصلہ آ گیا ہے جس پر عمل کرنا سب پر لازم ہے، سپریم کورٹ نے اسی عدالت کے 90 دن تک الیکشن کرانے کے حکم کو برقرار رکھا۔
جسٹس جواد حسن نے ریمارکس میں کہا کہ الیکشن کمیشن کے وکیل کے چہرے پر بھی آج مسکراہٹ دیکھ رہے ہیں، دکھائی دے رہا ہے کہ اسی طرح ہنستے ہنستے الیکشن بھی ہو جائیں گے۔
