کراچی: ایم کیو ایم رابطہ کمیٹی نے کہاہے کہ خورشید شاہ نے مہاجر لفظ کو گالی قرار دے کر توہین رسالت کی ہے۔
ایم کیو ایم کے مرکز نائن زیرو پر عامر خان اور دیگر رہنماوں کے ہمراہ پریس کانفرنس کرتے ہوئے رابطہ کمیٹی کے رکن عبدالحسب کا کہنا تھا کہ خورشید شاہ کے خلاف مفتیان کرام کے فتوے عدالت میں جمع کروا دیئے ہیں، اپنے بیان سے خورشید شاہ شریعت اور قوم کے مجرم قرار پاتے ہیں۔
عبدالحسیب نے مزید کہا کہ خورشید شاہ نے مہاجروں کے خلاف ہرزا سرائی کی، 17اکتوبر پاکستان کی تاریخ کا سیاہ ترین دن ہے کیونکہ اس دن خورشید شاہ نے 4مرتبہ لفظ ’’مہاجر‘‘ کو گالی قرار دیا۔جبکہ قرآن پاک میں مہاجر کی فضیلت کا ذکر آٹھ مرتبہ آیا ہے۔
ان کا کہنا تھا کہ ایم کیو ایم اس پر احتجاج کرتے ہوئے کل یوم سیاہ منائے گی جبکہ علمائے کرام سے فتووں کی کاپی لے کر عدالت میں جمع کروا دی ہے تاکہ خورشید شاہ کے خلاف قانونی کاروائی کی جا سکے، یوم سیاہ کا اعلان کرتے ہوئے انہوں نے ٹرانسپورٹرز سے بھی درخواست کی کہ وہ بھی اس کا حصہ بنیں اور ٹرانسپورٹ کا پہیہ جام کریں تاکہ احتجاج ریکارڈ کروایا جا سکے۔
