پاکستان کی ٹیکسٹائل برآمدات 22ماہ کی کم ترین سطح پر آگئیں، اس حوالے سے ذرائع کا کہنا ہے کہ برآمدات28 فیصد کم ہوکر ایک ارب20کروڑ ڈالر رہ گئی۔
ذرائع کے مطابق جنوری2023کے مقابلے میں ٹیکسٹائل برآمدات میں 9فیصد کی کمی واقع ہوئی ہے، ادارہ بیورو شماریات کی رپورٹ میں کہا گیا ہے کہ فروری2023میں مجموعی برآمدات 2 ارب 30 کروڑ ڈالر رہیں۔
رپورٹ کے مطابق فروری2023میں درآمدات4ارب 9لاکھ ڈالر ہوئیں، رواں سال فروری میں تجارتی خسارہ ایک ارب70 کروڑ ڈالر کا رہا، جولائی سے فروری میں پاکستان کی برآمدات18ارب79کروڑ ڈالر ہوئیں۔
ادارہ بیورو شماریات کی رپورٹ کے مطابق گزشتہ8ماہ میں درآمدات 40ارب9 کروڑ جبکہ تجارتی خسارہ21ارب تیس کروڑ ڈالر رہا۔
یاد رہے کہ پاکستان کا شمار دنیا کے بڑے ٹیکسٹائل پروڈیوسرز میں ہوتا ہے، اس کی ٹیکسٹائل کی برآمدات 2021 میں 19.3 بلین ڈالر یا 17.8 بلین یورو رہی، جو ملک کی مجموعی برآمدات کا نصف سے زیادہ بنتی ہے۔
