اسلام آباد : پاکستان تحریک انصاف سندھ کے رہنما علی زیدی نے پی پی رہبما آصف علی زرداری کے بیان پر اپنے شدید ردعمل کا اظہار کرتے ہوئے کہا ہے کہ زرداری سیاست کو لاحق بیماری کا نام ہے۔
یہ بات انہوں نے آصف زرداری کی وہاڑی میں کی جانے والی پریس کانفرنس کے جواب میں کہی، انہوں نے کہا کہ اس زرداری سے نجات جمہوریت کی بقا و سلامتی کیلئے ناگزیر ہے، حقیقی آزادی تحریک سے سب سے بڑا خطرہ زرداری کے ڈاکو راج کو ہے۔
علی زیدی کا کہنا تھا کہ اپنا مستقبل تاریک دیکھ کر حکومت کی ڈوبتی کشتی سے کودنے کی تیاریاں کی جارہی ہیں، اہلیان سندھ ڈاکو راج کا سب سے کلیدی اور بنیادی نشانہ ہیں، پیپلزپارٹی کے اس بے رحم گروہ نے سیلاب متاثرین کو سفاک سیاست کی بھینٹ چڑھایا۔
پی ٹی آئی رہنما نے کہا کہ عالمی پریس جس ڈاکو کی داستانوں سے بھرا پڑاہے وہ سیاست پر لیکچر نہیں دے سکتا، ملک بھر کی طرح اہل سندھ عمران خان کی قیادت پر یکسو ہیں۔
اپنے بیان میں ان کا مزید کہنا تھا کہ انتخابات میں سندھ کو زرداری کے ناپاک راج سے نجات میسر آئے گی، دونوں باپ بیٹے کے کھوکھلے ڈرامے اب ان کے کسی کام نہیں آئیں گے۔
واضح رہے کہ پاکستان پیپلزپارٹی کے شریک چیئرمین اور سابق صدر آصف علی زرداری نے وہاڑی میں منعقدہ پریس کانفرنس میں چیئرمین پی ٹی آئی عمران خان کو ملک کی معاشی تباہی کا ذمہ دار قرار دیتے ہوئے کہا تھا کہ ہم اس سے بات چیت نہیں کرسکتے کیونکہ عمران خان غیر سیاسی شخص ہے، سیاست میں جفاکشی کرنا پڑتی ہے اور عمران خان جفاکشی کا عادی نہیں۔
