اسلام آباد: وفاقی حکومت نے چیئرمین نیب کو مزید بااختیار بنانے کا فیصلہ کرلیا، جس کے بعد احتساب عدالت سے ناقابل سماعت قرار مقدمات چیئرمین نیب دیگر متعلقہ فورم کو بھیج سکیں گے۔
تفصیلات کے مطابق وفاقی حکومت نے چیئرمین نیب کو مزید بااختیار بنانے کا فیصلہ کرلیا اور وفاقی کابینہ نے نیب قوانین میں ترامیم کی سرکولیشن سے منظوری دے دی۔
ترامیم کے متن میں کہا گیا ہے کہ احتساب عدالت سے ناقابل سماعت قرار مقدمات چیئرمین نیب دیگر متعلقہ فورم کو بھیج سکیں گے، چیئرمین نیب ناقابل سماعت قرار کیس کا جائزہ لیکرمقدمہ بند کرنے کی منظوری بھی دے سکیں گے۔
متن کے مطابق نیب سے مقدمہ موصول ہونے پر متعلقہ ادارے کو از سر نو شواہد اکھٹے کرنے کا اختیار ہو گا۔
نیب ترامیم کے تحت مقدمہ ایک علاقےکی عدالت سے دوسری عدالت منتقل نہیں کیا جا سکے گا اور چیئرمین نیب کی عدم موجودگی میں نیب کےڈپٹی چیئرمین بطورچیئرمین اختیارات کااستعمال کریں گے۔
ترامیم میں کہا گیا ہے کہ ڈپٹی چیئرمین کی عدم موجودگی میں وفاق نیب کے کسی بھی سینئر افسر کو چیئرمین کے اختیارات سونپ سکے گا۔
نیب ترامیم کے مطابق ڈپٹی چیئرمین21گریڈکے سول افسر، لیفٹیننٹ جنرل یامیجر جنرل کے عہدے کے فوجی افسرکوتعینات کیا جا سکے گا۔
نیب ترامیم کے تحت ڈپٹی چیئرمین سینیٹ کوپبلک آفس ہولڈر کے زمرے میں شامل کر لیا گیا، اس سے قبل نیب قانون میں صرف چیئرمین سینیٹ پبلک آفس ہولڈر کے زمرہ میں آتے تھے۔
