اسلام آباد: الیکشن کمیشن آف پاکستان نے کہا ہے کہ عام انتخابات کے سلسلے میں آر اوز بیوروکریسی سے لینے کے علاوہ کوئی راستہ نہیں ہے۔
الیکشن کمیشن ذرائع کے مطابق آج جمعرات کو پی ٹی آئی رہنما شاہ محمود قریشی کی قیادت میں ایک وفد نے چیف الیکشن کمشنر سے ملاقات کی، جس میں انھوں نے پی ٹی آئی وفد کے تحفظات سنے، چیف الیکشن کمشنر نے پی ٹی آئی کو تحفظات اور خدشات کے حل کی یقین دہانی کرائی۔
ذرائع الیکشن کمیشن نے بتایا کہ چیف الیکشن کمشنر نے وفد سے گفتگو میں کہا کہ الیکشن کمیشن سپریم کورٹ فیصلے کی روشنی میں انتخابات کرانے کا پابند ہے، اور انتخابی مہم کی سخت مانیٹرنگ کی جائے گی۔
ذرائع کے مطابق چیف الیکشن کمشنر نے معاملہ نگراں وزیر اعلیٰ محسن نقوی کے ساتھ اٹھانے کی بھی یقین دہانی کرا دی۔ الیکشن کمیشن نے کہا کہ تمام سیاسی جماعتیں انتخابات کے حوالے سے الیکشن کمیشن سے تعاون کریں، الیکشن کمیشن تمام سیاسی جماعتوں کو برابر مواقع فراہم کرنے کے لیے اقدامات کرے گا۔
پی ٹی آئی ذرائع کا کہنا ہے کہ وفد نے آئی جی پنجاب اور چیف سیکریٹری پنجاب کو ہدایات جاری کرنے کا مطالبہ کیا، وفد کا آر اوز سے متعلق بھی مطالبہ تھا کہ یہ عدلیہ سے لیے جائیں۔ ملاقات میں وفد نے بیوروکریسی سے آر اوز لینے پر عدم اطمینان کا اظہار کیا، اور کہا کہ خدشہ ہے بیوروکریسی غیر جانب دار انتخابات نہیں کرا سکتی، نگراں حکومت پنجاب بیوروکریسی کے آر اوز پر اثر انداز ہوگی۔
تاہم الیکشن کمشنر نے کہا کہ الیکشن کمیشن نے آر اوز عدلیہ سے لینے کی کوشش کی، لیکن لاہور ہائیکورٹ نے جوڈیشل افسران کی فراہمی سے معذرت کر لی ہے، آر اوز بیوروکریسی سے لینے کے علاوہ کوئی راستہ نہیں۔ چیف الیکشن کمشنر نے کہا کہ آر اوز کی تعیناتی مزید التوا میں ڈالنے سے الیکشن ملتوی ہو سکتے ہیں۔
