کوئٹہ کی عدالت نے سابق وزیراعظم عمران خان کے وارنٹ گرفتاری جاری کردیے۔
اے آر وائی نیوز کے مطابق کوئٹہ کی جوڈیشل مجسٹریٹ بشیر احمد بازئی کی عدالت نے عمران خان کے وارنٹ گرفتاری جاری کیے ہیں ان کے خلاف ملکی اداروں کے خلاف ہرزہ سرائی کا مقدمہ درج ہے۔
تھانہ بجلی گھر میں درج مقدمے میں عمران خان کی گرفتاری کے وارنٹ جاری کیے گئے ہیں جبکہ انہیں گرفتار کرکے پیش کرنے کا حکم دیا گیا ہے۔
واضح رہے کہ دو روز قبل شہری عبدالخلیل کاکڑ کی جانب سے درج کرائے گئے مقدمے میں مؤقف اختیار کیا گیا تھا کہ عمران خان نے ریاستی اداروں کے خلاف بے بنیاد الزامات عائد کئے۔
درخواست میں موقف اختیار کیا گیا کہ عمران خان نے ریاستی اداروں کے افسران کے خلاف بلاجواز اشتعال انگیز تقاریر کرکے نفرت پھیلائی۔
عمران خان نے گزشتہ روز لاہور ہائی کورٹ میں کوئٹہ کے مقدمے میں حفاظتی ضمانت کی درخواست دائر بھی کی تھی۔
