لاہور : تحریک انصاف کے مرکزی رہنما شاہ محمود قریشی نے حکومتی اتحاد کو تنقید کا نشانہ بناتے ہوئے کہا ہے کہ پی ڈی ایم ایک غیر فطری اتحاد تھا جو اب بکھرتا دکھائی دے رہا ہے۔
یہ بات انہوں نے لاہور زمان پارک میں چیئرمین پی ٹی آئی عمران خان کی رہائش گاہ کے باہر میڈی اسے گفتگو کرتے ہوئے کہی، انہوں نے اس عزم کا اعادہ کیا کہ ہم عمران خان کے ساتھ کھڑے ہیں اور کھڑے رہیں گے۔
شاہ محمود قریشی نے کہا کہ کوئی نگراں حکومت یا پی ڈی ایم تحریک انصاف کے کارکنوں کے جذبے کو کم نہیں کرسکتی، عوام پی ڈی ایم سرکار کو پوری طرح مسترد کرچکے ہیں،
انہوں نے کہا کہ موجودہ حکومت سیاسی اور معاشی میدان میں مکمل ناکام ہوچکی ہے، اس کی اپنی صفوں میں دراڑ پڑگئی ہے، ن لیگ آج پیپلز پارٹی کو شک کی نگاہ سے دیکھ رہی ہے اور اسی لیے پیپلزپارٹی پی ڈی ایم سے فرار کا سنجیدگی سے سوچ رہی ہے۔
شاہ محمود قریشی کا کہنا تھا کہ پی ڈی ایم ایک غیر فطری اتحاد تھا جو بھکرتا ہوا دکھائی دے رہا ہے، وقتی مفاد کیلئے یہ یکجا ہوئے اب پارا پارا ہونے کے قریب ہیں، خوف کے بادل اب چھٹ گئے ہیں۔
رہنما پی ٹی آئی نے میڈیا کو مزید بتایا کہ گزشتہ روز کارکن بھی ہمارا قتل ہوا اور قتل کا مقدمہ بھی ہمارے خلاف ہی درج کیا گیا ہے،ان حرکتوں سے موجودہ حکومت خود اپنی ساکھ متاثر کررہی ہے۔
