لاہور : چیئرمین پاکستان تحریک انصاف اور سابق وزیر اعظم عمران خان نے گزشتہ روز جاں بحق ہونے والے کارکن علی بلال عرف ظل شاہ کے قتل کی عدالتی تحقیات کرانے کا مطالبہ کیا ہے۔
یہ بات انہوں نے اپنی رہائش گاہ زمان پارک سے براہ راست ایک ویڈیو خطاب میں کہی، عمران خان کا خطاب دیکھنے کیلئے زمان پارک کے باہر ایک کنٹینر پر خصوصی اسکرین نصب کی گئی تھی، کارکنان کی بڑی تعداد زمان پارک کے باہر موجود رہی، کیمپس اور کارکنان کی وجہ سے کینال روڈ پر ٹریفک جام رہا۔
عمران خان کا کل 2 بجے لاہور میں ریلی نکالنے کا اعلان#ARYNews #ImranKhan #PTI pic.twitter.com/uDXz4q5hEs
— ARY NEWS (@ARYNEWSOFFICIAL) March 11, 2023
کارکنان سے خطاب کرتے ہوئے انہوں نے بتایا کہ گزشتہ روز قتل کیے جانے والے پی ٹی آئی کارکن ظل شاہ پر پولیس نے تشدد کیا، اس کی لاش سڑک سے ملی، اس کو بدترین تشدد کا نشانہ بنا کرشہید کیا گیا، سوشل میڈیا پر اس کی ویڈیوز دیکھ لیں۔
عمران خان نے مطالبہ کیا کہ ظل شاہ کے قتل کی جوڈیشل انکوائری کی جائے اور چیف جسٹس لاہور ہائیکورٹ ظل شاہ کے قتل پر جوڈیشل کمیشن تشکیل دیں۔
ان کا کہنا تھا کہ تحریک انصاف کے کارکنان نے اس سے پہلے بھی بڑی قربانیاں دی ہیں، 11سال کے بچے کو بھی جیل میں ڈال دیا گیا، ہمارے ایک کارکن کو راوی پل سےنیچے پھینکا گیا تھا، اٹک پل پر بھی پولیس شیلنگ سے بھی ہمارا ایک کارکن شہید ہوچکا ہے۔
