لاہور : مرکزی سینئر نائب صدر پاکستان تحریک انصاف فواد چوہدری نے توشہ خانہ تحقیقات کیلئے عدالتی کمیشن بنانے کا مطالبہ کردیا۔
تفصیلات کے مطابق مرکزی سینئر نائب صدر پاکستان تحریک انصاف فواد چوہدری نے اہم بیان میں کہا ہے کہ توشہ خانہ تفصیلات کے مطابق شریف اور زرداری خاندان نے ڈاکا مارا ، دھوکہ دہی میں ملوث شریف اور زرداری خاندان کا ایک اور ثبوت سامنے آ چکا ہے۔
فواد چوہدری کا کہنا تھا کہ پچھلے 11 ماہ میں عمران خان اور بشریٰ بی بی پر الزامات کی بوچھاڑ کی گئی جبکہ عمران خان نے توشہ خانہ سے قانونی طریقہ کار کے تحت ان سب سے کم سے تحائف لئے۔
زرداری اور نواز کے حوالے سے رہنما پی ٹی آئی نے کہا کہ زرداری اور نواز شریف نے غیر قانونی طور پر توشہ خانہ سے گاڑیاں نکلوائیں، توشہ خانہ قانون کی کھلے عام خلاف ورزیاں کی گئیں، جو فہرست منظر عام پر آئی وہ نامکمل ہے، 1988 سے تفصیلات سامنے آنی چاہئیں۔
لاہور ہائیکورٹ کے چیف جسٹس کے حکم پر یہ سب ممکن ہوا انکا شکریہ ادا کرنا چاہتے ہیں، انھوں نے عوام کو ملک میں شفافیت کی نئی راہ دکھائی۔
لاہور ہائیکورٹ کمیشن بنا کر تحقیقات کرے کہ حکمرانوں نے تحفوں کی قیمت قانون کے مطابق ادا کی یا نہیں، ان کو اثاثوں میں ڈکلیئر کیا یا نہیں؟
ن لیگ کو عمران خان اور بشریٰ بی بی کے خلاف منفی مہم چلانے پر ان سے معافی مانگنی چاہئے، ن لیگ کی جھوٹی مہم اور گھٹیا بیانیہ کا پول عوام کے سامنے کھل چکا ہے۔
