لاہور: ہائی کورٹ نے نواز شریف کو علاج کے لیے بیرون ملک جانے کی اجازت دینے کے کیس میں فریق بننے کی فواد چوہدری کی درخواست مسترد کر دی.
لاہور ہائیکورٹ کے جسٹس علی باقر نجفی کی سربراہی میں دو رکنی بنچ نے فواد چوہدری کی درخواست پر سماعت کی جس میں فریق بننے کی استدعا کی گئی تھی۔
عدالت نے ریمارکس دیے کہ اس معاملے میں نیب اور وفاقی حکومت فریق تھے، اس بارے نیب درخواست دائر کر سکتا ہے۔
فواد چوہدری کے وکیل نے مؤقف پیش کیا کہ نواز شریف واپس نہیں آ رہے ہیں، جنھوں نے پچاس روپے کا اسٹام داخل کرایا وہ اب وزیر اعظم ہے، ان لوگوں نے کورٹ کے ساتھ فراڈ کیا ہے۔
عدالت نے استفسار دیا کہ جب آپ کے پاس اختیار تھا تب آپ نے یہ معاملہ کیوں نہیں اٹھایا جو آپ اب اٹھا رہے ہیں؟
فواد چوہدری نے کہا کہ نواز شریف بیرون ملک پارٹی کر رہے ہیں، ہر روز نئے ریسٹورنٹ میں نظر آتے ہیں، وہ تو اس پر پوری کتاب لکھ سکتے ہیں۔
عدالت نے ریمارکس دیے کہ یہ سیاسی باتیں ہیں، فواد چوہدری نے کہا کہ جنھوں نے نواز شریف کو باہر بھجوایا اور جن وجوہ کے سبب بھجوایا وہ عدالت کے علم میں لانا چاہتا ہوں۔
تاہم درخواست گزار کو سننے کے بعد عدالت نے درخواست کو ناقابل سماعت قرار دے کر مسترد کر دیا۔
