پنجاب کی نگراں حکومت نے پاکستان تحریک انصاف کو اتوار 19 مارچ کو مینار پاکستان پر جلسے کی اجازت نہ دینے کا فیصلہ کیا ہے۔
اے آر وائی نیوز کو ذرائع سے ملنے والی اطلاعات کے مطابق پنجاب کی نگراں حکومت نے پاکستان تحریک انصاف کو 19 مارچ کو لاہور میں مینار پاکستان پر اعلان کردہ جلسے کی اجازت نہ دینے کا فیصلہ کیا ہے۔
حکومتی ذرائع نے بتایا ہے کہ پنجاب کی نگراں حکومت نے پی ٹی آئی کو جلسے یا ریلی کی اجازت نہ دینے کا قطعی فیصلہ کر لیا ہے۔ اگر اتوار 19 مارچ کو ریلی نکالی گئی تو اس روز لاہور شہر میں دفعہ 144 نافذ کر دی جائے گی۔
واضح رہے کہ پاکستان تحریک انصاف کے چیئرمین اور سابق وزیراعظم عمران خان نے گزشتہ دنوں لاہور میں نکالی گئی ریلی کے اختتام پر اتوار 19 مارچ کو جلسہ عام کرنے کا اعلان کیا تھا۔
دوسری جانب لاہور ہائیکورٹ نے آج پی ٹی آئی کو 19 مارچ کے دن مینار پاکستان پر جلسہ کرنے سے روک دیا اور کہا کہ جلسہ کرنا ہے تو 15 دن پہلے اجازت لی جائے۔
زمان پارک میں پولیس آپریشن کیخلاف درخواست پر سماعت کے دوران عدالت نے تحریک انصاف کو اتوار کا جلسہ کرنے سے روکتے ہوئے کہا کہ چیف سیکرٹری پنجاب اور آئی جی پنجاب سے ملکرمشاورت کریں۔ اگر جلسہ کرنا ہے تو 15 روز پہلے اجازت لیں۔