بھارت میں ایسے واقعات سامنے آتے ہیں جسے دیکھ کر یا سن کر سب حیران رہ جاتے ہیں، بعض دفعہ لوگ سوچنے پر مجبور ہوجاتے ہیں کہ کیا واقعی ایسا ہوسکتا ہے۔
ایسا ہی ایک معاملہ بھارت کی شمالی ریاست بہار میں پیش آیا ہے جہاں ایک دلہن سج دھج کر اپنے دلہے کا انتظار کرتی رہی لیکن دلہے میاں خود اپنی شادی میں جانا بھول گئے۔
بھارتی میڈیا کے مطابق ریاست بہار کی سلطان گنج کے ایک گاؤں میں شادی کی تیاریاں ہورہی تھیں، جبکہ بھاگلپور سے بارات آنے والی تھی لیکن دلہا شادی سے پہلے دھت ہوگیا اور اپنی شادی میں ہی نہیں پہنچ سکا۔
یہ بھی پڑھیں: دولہا بارات لے کر تھانے کیوں پہنچا ؟ پولیس بھی پریشان
رپورٹ میں بتایا گیا کہ جب دلہے کا نشہ اترا تو اسے زور دار جھٹکا لگا، جس کے بعد وہ اپنی دلہن لینے اس کے گھر پہنچا تو دلہن نے شادی سے انکار کردیا، دلہن نے کہا کہ اس لڑکے کو اپنی ذمہ داری کا احساس نہیں اور میں ایک شرابی کے ساتھ زندگی نہیں گزار سکتی اس لیے میں اس شادی سے انکار کرتی ہوں۔
رپورٹ کے مطابق لڑکی کے گھر والوں نے شادی کے انتظامات میں جوبھی خرچہ ہوا تھا اسے دلہے والوں سے واپس کرنے کا مطالبہ شروع کردیا، لڑکی کے اہلخانہ نے لڑکے کے گھر سے ایک فرد کو یرغمال بنالیا۔
