اسلام آباد : تحریک انصاف کے چیئرمین عمران خان کی توشہ خانہ کیس میں جوڈیشل کمپلیکس میں پیشی کے موقع پر شدید ہنگامہ آرائی ہوئی جس میں پولیس اور کارکنان کے درمیان جھڑپیں اور جلاؤ گھیراؤ سے صورتحال کشیدہ ہوگئی۔
تفصیلات کے مطابق اسلام آباد کا جوڈیشل کمپلیکس چیئرمین پی ٹی آئی کی پیشی کے موقع پر میدان جنگ بن گیا، پولیس کی جانب سے کارکنا کو گرفتار کرنے کی کوشش کے بعد ہنگامہ آرائی کی صورتحال پیدا ہوگئی۔
اس حوالے سے پولیس کا مؤقف ہے کہ جوڈیشل کمپلیکس کے باہرہنگامہ آرائی میں پولیس کی 2 گاڑیوں کو نذر آتش کیا گیا جبکہ پی ٹی آئی کارکنان کے مبینہ تشدد سے 9 اہلکار زخمی ہوئے ہیں۔
پولیس ترجمان کے مطابق مشتعل مظاہرین نے25سے زائد موٹرسائیکلیں اور گاڑیوں کو جلایا، اس کے علاوہ پولیس چوکی اور درختوں کو بھی آگ لگائی۔
اسلام آباد پولیس کے مطابق مظاہرین کی جانب سے پولیس پر پیٹرول بموں سے حملہ کیا گیا اور پولیس پر آنسو گیس کے شیل بھی چلائے گئے، مظاہرین لگاتار مختلف اطراف سے پولیس اہلکاروں پر حملہ آورہو رہے تھے۔
نذر آتش کی جانے والی گاڑیوں میں اسلام آباد پولیس کی دو اور بم ڈسپوزل اسکواڈ کی گاڑی بھی شامل ہے۔