تھرپارکر: وزیر اعظم شہباز شریف نے کہا ہے کہ آئین پاکستان سب پر مقدم ہے، کوئی قانون، آئین سے بالاتر نہیں ہے۔
وزیر اعظم شہباز شریف نے تھرپارکر میں افتتاحی تقریب سے خطاب میں کہا کہ آج پورے پاکستان کے لیے خوشی کا دن ہے، تھر کے صحرا میں 330 میگاواٹ، 1320 میگاواٹ بجلی منصوبےکا افتتاح ہوا، دہائیوں کی محنت، پلاننگ، مربوط حکمت عملی کی بدولت صحرا صنعت میں بدل چکا ہے۔
انہوں نے کہا کہ ان منصوبوں کی تکمیل قومی اہمیت کی حامل ہے، تھر میں ریت کے میدان میں آج ہزاروں میگا واٹ بجلی پیدا ہورہی ہے، تھر سے پیدا ہونیوالی روشنی پورے پاکستان میں پھیل رہی ہے، یہ ترقی کا سفر پاکستان کی ترقی اور خوشحال موجد بنے گا۔
وزیراعظم شہبازشریف کا کہنا تھا کہ کچھ لوگ کہہ رہے ہیں کوئلے کی بنیاد بجلی نہیں بننی چاہیے، تھر کوئلہ اللہ نے تحفے کے طور عنایت کیا ہے، تھر کوئلہ 100 سال تک ہزاروں میگاواٹ بجلی پیداکر سکتا ہے، تھر سے بجلی بنے گی تو اربوں ڈالر کا کوئلہ امپورٹ نہیں کرنا پڑے گا۔
وزیراعظم نے کہا کہ تھر کے منصوبوں سے پاکستان کی معیشت کو بے پناہ تقویت ملےگی، ہمیں کسی کنفیوژن کا شکار نہیں ہونا چاہیے، وفاق اور سندھ ملکر پلاننگ کرینگے تو پاکستان ترقی کے دور میں آگے نکلے گا۔
وزیراعظم شہباز شریف نے کہا کہ تھر میں ایک عظیم منصوبہ شروع ہوچکا ہے، تھرکول سے اربوں ڈالر کی بجلی پیدا ہوگی، ٹرانسمیشن لائنز پر کام تیزی سے رواں دواں ہے، بدقسمتی سے 4 سال میں رتی برابر کام نہیں ہوا تھا، لیکن اب ٹرانسمیشن لائنز پر کام تیزی رواں دواں ہے۔
30 اپریل تک ٹرانسمیشن لائنز لگ جائیں گی، ٹرانسمیشن لائنز کے ذریعے بجلی پاکستان کے طول وعرض میں پہنچ جائے گی۔
وزیر اعظم شہباز شریف نے کہا کہ مشکلات کے باوجود ساتھ دینے پر چینی حکومت کا شکریہ ادار کرتا ہوں، سی پیک کا اگلا ہدف زراعت، آئی ٹی ہے، موقع آگیا ہے کہ سی پیک کو مزید آگے لیکر جائیں، سی پیک کو اپنے ترقی کا حصہ سمجھتے ہیں۔
وزیراعظم شہباز شریف کا مزید کہنا تھا کہ آئین پاکستان سب پر مقدم ہے کوئی قانون، آئین سے بالاتر نہیں ہے، کوئی ملک میں دہشتگردوں کو پناہ نہیں دے سکتا، ہم دہشتگردوں کو پناہ دیں اور شیلڈ بنائیں یہ ناقابل برداشت بات ہے۔
