اسلام آباد : پنجاب میں عام انتخابات کی منسوخی پر الیکشن کمیشن نے صدر مملکت عارف علوی کو اعتماد میں لینے کے لئے خط لکھا دیا، جس میں انتخابات منسوخی کی وجوہات سےآگاہ کیا۔
تفصیلات کے مطابق پنجاب میں عام انتخابات کی منسوخی پر الیکشن کمیشن نے صدر مملکت عارف علوی کو خط لکھا، ذرائع نے بتایا کہ خط میں صدر مملکت کو ان تمام وجوہات کی تفصیلات بتائیں گئیں جن کی بنیاد پر الیکشن کمیشن نے پنجاب میں عام انتخابات کا دیا گیا شیڈول منسوخ کیا۔
خط میں کہا گیا کہ الیکشن کمیشن نے سپریم کورٹ کے فیصلے کی روشنی میں انتخابات کے لئے شیڈول جاری کیا کیوں کہ صاف شفاف اور غیر جانبدار انتخابات الیکشن کمیشن کی ذمہ داری ہے۔
ذرائع کے مطابق الیکشن کمیشن کا خط میں کہنا تھا کہ پنجاب میں صاف شفاف اور غیر جانبدار انتخابات کے لیے گورنر، چیف سیکرٹری اور آئی جی پولیس کے علاوہ سیکیورٹی اداروں کے ساتھ بھی ملاقاتیں اور رابطے کئے گئے تاہم تمام اسٹیک ہولڈرز فوری انتخابات کے لۓ تیار نہیں جبکہ سیکیورٹی کے حوالے سے بھی نفری کی فراہمی سے معذرت کی گئی۔
خط میں آئین کے آرٹیکل 218(3) اور الیکشن ایکٹ 2017 کے سیکشن 58 اور 8سی کا بھی حوالہ دیا گیا، جس کے تحت انتخابات منسوخ کئے گئے ۔
الیکشن کمیشن کی جانب سے یہ بھی کہا گیا کہ تیس اپریل کو انتخابات ممکن نہیں تھے اس لئے 8 اکتوبر کی تاریخ پولنگ کے لئے مقرر کی گئی تاہم شیڈول بعد میں جاری کر دیا جائے گا۔
