اسلام آباد: اسپانسر شپ حج اسکیم کے تحت درخواستوں کی وصولی کی مدت بڑھا کر 7 اپریل کر دی گئی۔
ذرائع وزارت مذہبی امور کا کہنا ہے کہ اسپانسر شپ حج اسکیم کے تحت درخواستوں کی وصولی کی تاریخ بڑھا دی گئی ہے، درخواستوں پر قرعہ اندازی 5 اپریل کو ہوگی۔
رواں سال ایک لاکھ 79 ہزار پاکستانی عازمین فریضہ حج ادا کریں گے۔
اسپانسرشپ حج اسکیم کے تحت بیرون ملک سے درخواستیں جمع کرانے میں تیزی آ گئی ہے، حکومت کو ایک ہی روز میں 34 لاکھ 3 ہزار 775 ڈالرز موصول ہو گئے ہیں۔
بیرون ملک مقیم پاکستانیوں نے ایک روز میں 787 درخواستیں جمع کرا دیں، بیرون ملک سے 5 ہزار 890 حج درخواستیں جمع کرائی گئی ہیں۔
ذرائع وزارت مذہبی امور کے مطابق اسپانسرشپ حج اسکیم بیرون ملک مقیم پاکستانیوں اور ملک میں ان کے رشتہ داروں کے لیے ہے، بیرون ملک سے درخواست کے ہمراہ 4325 ڈالرز وصول کیے جا رہے ہیں۔
واضح رہے کہ وزارت مذہبی امور نے اسکیم کے تحت درخواستوں پر وزرات خارجہ سے مدد طلب کی تھی۔
