لاہور : سابق ایس پی فرحت عباس کو قتل کروانے میں ملزمہ حرا کے باپ کے بھی شامل ہونے کا انکشاف سامنے آیا، پولیس کا کہنا ہے کہ باپ نےشوٹرعارف کوموٹر سائیکل بھی دی۔
تفصیلات کے مطابق سابق ایس پی فرحت عباس قتل کیس میں مزید حقائق سامنے آگئے، پولیس ذرائع نے بتایا کہ فرحت عباس کو قتل کروانےمیں ملزمہ حرا کا باپ مبارک بھی شامل ہیں۔
پولیس ذرائع کا کہنا تھا کہ ملزمہ حرا کےباپ نےشوٹرعارف کوموٹر سائیکل بھی دی جبکہ ملزمہ نےشوٹرکو ہوٹل بھی اپنے پیسوں سے لے کردیا۔
لاہور پولیس نے مزید حقائق جاننے کے لیے تحقیقات کا دائرہ وسیع کردیا اور کہا ہے کہ ملزمہ کے والد مبارک کو بھی جلد گرفتار کر لیا جائے گا۔
یاد رہے لاہور کے علاقے ملت پارک میں قتل ہونے والے سابق ایس پی فرحت عباس شاہ کے قتل کی تحقیقات جاری ہے ، سی آئی اے ٹیم نے ایس پی (ر) فرحت عباس شاہ کے قتل میں ملوث 2 خواتین سمیت 3 افراد کو گرفتار کیا تھا۔
جس کے بعد فرحت عباس شاہ کے قتل میں اس کی بھابھی کے ملوث ہونے کا انکشاف سامنے آیا، پولیس نے بتایا تھا کہ فرحت عباس کو قتل کرنے کے لیے ان کی بھابھی حرا عرف ثنا نے اپنے سیکیورٹی گارڈ کے ساتھ ایک طویل منصوبہ بندی کی، مقتول بیوہ بھابھی کو ذاتی گارڈ رکھنے سے منع کرتے تھے۔
ایس ایس پی کے مطابق مقتول کی بھابھی نے جائیداد کے تنازع کے لیے فرحت عباس کو قتل کروایا۔
واضح رہے کہ لاہور کے علاقے ملت پارک میں نامعلوم موٹر سائیکل سوار نے سابق ایس پی فرحت عباس کو دن دہاڑے ان کے گھر کے باہر فائرنگ کر کے قتل کر دیا تھا۔
