امریکا کے ایک وائلڈ لائف پارک میں کیمرے کی آنکھ نے ایک پراسرار اجنبی جانور قید کرلیا جسے پارک کی انتظامیہ شناخت نہ کرسکی اور لوگوں کی مدد لینے پر مجبور ہوگئی۔
جنوبی ٹیکسس کے وائلڈ لائف پارک کی انتظامیہ نے سماجی رابطے کی ویب سائٹ فیس بک پر ایک جانور کی تصویر پوسٹ کی۔
پوسٹ میں لکھا گیا کہ یہ تصویر رات کے اندھیرے میں کھینچی گئی اور اسے دیکھ کر ہم اپنا سر کھجانے پر مجبور ہوگئے کیونکہ ہم اس جانور کو شناخت نہیں کر پا رہے۔
انہوں نے لکھا کہ کیا یہ کوئی نئی قسم کا جانور ہے؟ یا پھر کوئی پارک کا رینجر بھیس بدل کر وہاں موجود ہے؟
انتظامیہ نے لوگوں سے کہا کہ وہ اس جانور کی شناخت میں ان کی مدد کریں۔
اس تصویر نے لاکھوں لوگوں کی توجہ حاصل کرلی اور لوگوں نے اس پر مختلف آرا دیں۔
بعض لوگوں نے اسے بلی اور شیر کی نسل کا ایک جانور قرار دیا جبکہ بعض نے علاقے میں پائے جانے والے ایک چوہے کا نام لیا۔
کچھ افراد نے کہا کہ یہ ممکنہ طور پر کوئی دوغلی نسل کا جانور ہے جو اس وقت پیدا ہوتا ہے جب دو علیحدہ نسل کے جانور ایک دوسرے کے قریب آتے ہیں۔
بعد ازاں پارک انتظامیہ نے اسے امریکی بیجر سے قریب ترین قرار دیا، یہ جانور جسے بجو کہا جاتا ہے زمین کھودنے کا خاص ماہر ہے اور یہ عموماً رات کے وقت بے حد فعال ہوتا ہے۔
