اسلام آباد: وزیردفاع خواجہ آصف کا کہنا ہے کہ آج کل ایک بندہ شیلڈ لگا کرآرہا ہے اور کہتا ہے کہ میری جان کو خطرہ ہے، اس کہتا ہوں کہ اتنے پنگے نہ لو۔
تفصیلات کے مطابق قومی اسمبلی میں دھواں دھار تقریر کرتے ہوئے خواجہ آصف نے نام لئے بغیر سابق وزیراعظم عمران خان کو کڑی تنقید کا نشانہ بناتے ہوئے کہا کہ جب مقابلہ نہیں کرسکتے تو آرام سے گھر جاکر بیٹھو، اس طرح تو ہوتا ہے اس طرح کے کاموں میں، ایسے کاموں میں تو جان کا خطرہ ہوتا ہے حالات کا مقابلہ کرنا ہوتا ہے۔
وزیرستان میں آپریشن سے متعلق سوال کا جواب دیتے ہوئے وزیر دفاع خواجہ آصف نے کہا کہ علی وزیر اور محسن داوڑ نے درست باتیں کی ہیں، یہ شاخسانہ دو تین دہائیوں کا ہے پہلے جنرل ضیا کے دور میں اور پھر مشرف دور میں فرد واحد کے فیصلے تھے جس کے نتیجہ میں ہمارے بے شمار فوجی اور پولیس والے شہید ہوئے۔
انہوں نے کہا کہ افغانستان سے باقاعدہ لا کر افغانیوں کو پر امن ولاقوں میں بسایا گیا۔ ارکان کا مطالبہ درست ہے کہ یہ فیصلہ کرنے والوں کے خلاف کارروائی ہونی چاہئے۔ انہوں نے کہا کہ ان میں سے لوگ زمان پارک میں بھی لوگ جا کر بیٹھے ہیں، یہ عمران خان کی پشت پناہی کررہے ہیں۔
