اسلام آباد: الیکشن کمیشن آف پاکستان نے خیبر پختون خوا میں قومی اسمبلی کے 3 حلقوں میں ضمنی انتخابات ملتوی کر دیے۔
تفصیلات کے مطابق خیبر پختون خوا کے قومی اسمبلی کے 3 حلقوں میں ضمنی انتخابات ملتوی کر دیے گئے، ان حلقوں میں 30 اپریل کو انتخاب شیڈول تھے۔
قومی اسمبلی کے ان حلقوں میں این اے 22 مردان، این اے 24 چارسدہ، اور این اے 31 پشاور شامل ہیں۔
الیکشن کمیشن نے کہا کہ پشاور ہائیکورٹ کے حکم پر انتخابات تاحکم ثانی ملتوی رہیں گے، نیز، الیکشن کمیشن کی جانب سے جاری 8 مارچ کا نوٹیفکیشن بھی معطل کر دیا گیا۔
واضح رہے کہ اس سے قبل 12 مارچ کو الیکشن کمیشن آف پاکستان نے قومی اسمبلی کی 36 نشستوں پر ضمنی انتخابات ملتوی کر دیے تھے، جن میں خیبر پختون خوا کے 24 حلقے، اسلام آباد کے 3 اور کراچی کے 9 حلقے شامل تھے، کے پی میں انتخابات پشاور ہائیکورٹ کے فیصلے کی روشنی میں ملتوی کیے گئے تھے۔
