خیبر : طور خم سرحدی گزرگاہ کے قریب ایکسپورٹ روڈ پر پہاڑی تودہ گرنے سے متعدد کنٹینرز اور مال بردارگاڑیاں ملبے تلے دب گئیں، کچھ گاڑیوں میں آگ بھڑک اٹھی۔

تفصیلات کے مطابق طورخم ایکسپورٹ روڈ پر پہاڑی تودہ گرنے سے متعدد کنٹینرز اور مال بردار گاڑیاں ملبے تلے دب گئیں اور اس دوران متعدد گاڑیوں میں آگ بھی لگ گئی جبکہ آگ بجھانے کی کوششیں جاری ہیں۔

ڈپٹی کمشنر عبدالناصر خان نے میڈیا کو بتایا کہ ملبے تلے دب جانے والی گاڑیوں میں عملہ بھی موجود ہے، جس کے باعث جانی نقصان کا خدشہ ہے، لنڈی کوتل اسپتال میں ایمرجنسی نافذ کردی گئی ہے۔

انہوں نے بتایا کہ بھاری مشنری اور ریسکیو عملہ امدادی کارروائی میں مصروف ہے، ملبہ ہٹانے اور ریکسیو آپریشن مکمل ہونے تک اصل نقصانات کا اندازہ لگانا قبل از وقت ہوگا۔

ریسکیو حکام کا کہنا ہے کہ حادثے میں کئی افراد زخمی ہوئے، اب تک 8 زخمیوں کو طبی امداد فراہم کی گئی جبکہ 3 زخمیوں کو لنڈی کوتل اسپتال منتقل کردیا گیا۔