اسلام آباد : چیئرمین پی ٹی آئی عمران خان کی آج اسلام آباد ہائیکورٹ میں پیشی تھی، تاہم ان کے وکیل کا کہنا ہے کہ سابق وزیر اعظم سیکیورٹی خطرات کے پیش نظر آج عدالت میں پیش نہیں ہونگے۔
تفصیلات کے مطابق عمران خان کی8مقدمات میں عبوری ضمانت آج ختم ہورہی ہے ان کی ضمانت قبل ازگرفتاری کی درخواستوں پر سماعت مقرر تھی۔
اس حوالے سے عمران خان کے وکیل بیرسٹرگوہرعلی نے عدالت کو بتایا کہ عمران خان سیکیورٹی خطرات کے پیش نظر آج عدالت میں پیش نہیں ہونگے۔
بیرسٹرگوہرعلی کا کہنا تھا کہ عمران خان کے پاس مطلوبہ سیکیورٹی کے انتظامات موجود نہیں حاضری سے استثنیٰ کی درخواست آج ہائیکورٹ میں داخل کریں گے۔
ذرائع کا کہنا ہے کہ آج اسلام آباد کی تین مختلف عدالتوں میں عمران خان کے کیس مقرر ہیں، عمران خان کی حاضری سےاستثنیٰ کی درخواستیں مختلف عدالتوں میں دائرکی جائیں گی۔
سابق وزیراعظم کی استثنیٰ کی درخواستیں سکیورٹی وجوہات اور سیاسی نوعیت کے مقدمات کے باعث دائر کی جائیں گی۔
اس سے قبل اسلام آباد ہائیکورٹ کی جانب سے آئی جی اور ضلع انتظامیہ کو سیکیورٹی کے سخت ترین انتظامات کی ہدایت کی گئی تھی۔ جس کے مطابق کمرہ عدالت میں صرف مخصوص پاس کے ذریعے ہی رسائی ممکن ہوگی۔
اس کے علاوہ زمان پارک کے اطراف سیکیورٹی کے سخت انتظامات کیے گئے تھے، ریسکیو اورجیمر گاڑیاں بھی زمان پارک پہنچ گئی تھیں۔
