کراچی : وزیرصحت سندھ عذراپیچوہو کا کہنا ہے کہ کراچی میں منکی پاکس کاکوئی کیس رپورٹ نہیں ہوا، مسافر میں منکی پاکس کے حوالے سے خبروں میں کوئی صداقت نہیں۔
تفصیلات کے مطابق وزیر صحت سندھ ڈاکٹر عذرا پیچوہو اپنے بیان میں کہا ہے کہ کراچی میں منکی پاکس کا کوئی کیس رپورٹ نہیں ہوا، کراچی ایئرپورٹ پر ایک مسافر میں منکی پاکس کے حوالے سے خبروں میں کوئی صداقت نہیں ہے۔
ڈاکٹر عذرا پیچوہو کا کہنا تھا کہ ایئرپورٹ انتظامیہ کو اس حوالے سے تصدیق کے بغیر کسی قسم کی اطلاع جاری کرنے کا کوئی اختیار نہیں، محکمہ صحت تمام تر صورتحال کو ازخود مانیٹر کر رہا ہے۔
وزیر صحت سندھ نے کہا کہ جناح اسپتال اور چانڈکا میڈیکل اسپتال میں آئسولیشن وارڈ قائم کئے جا چکے ہیں اور کراچی میں20بستروں پر مشتمل علیحدہ آئسولیشن وارڈ تشکیل دیا گیا ہے۔
ان کا مزید کہنا تھا کہ منکی پاکس سے متعلق غیر مصدقہ اطلاعات فراہم کرنے سے گریز کیا جائے، صوبہ سندھ میں منکی پاکس کا ایک بھی کیس رپورٹ نہیں ہوا۔
