امیر جماعت اسلامی پاکستان سراج الحق نے کہا ہے کہ تمام سیاسی جماعتیں الیکشن کے لیے تیار ہیں مسئلہ صرف تاریخ کا ہے کہ کب ہونے ہیں۔
اے آر وائی نیوز کے مطابق امیر جماعت اسلامی پاکستان سراج الحق نے اسلام آباد میں میڈیا سے گفتگو کرتے ہوئے کہا ہے کہ تمام سیاسی جماعتیں الیکشن کے لیے تیار ہیں مسئلہ صرف تاریخ کا ہے کہ کب ہونے ہیں۔ پی ڈی ایم، عمران خان اور ہمارا مطالبہ بھی فل کورٹ اجلاس بلانے کا تھا کیونکہ یہ پوری قوم کا مسئلہ ہے اس لیے فل کورٹ اجلاس ہو۔
سراج الحق نے کہا کہ سیاسی تنازعات کا حل سپریم کورٹ سے نہیں جُڑا ہے۔ سپریم کورٹ اپنے کندھے پر بوجھ اٹھانے کے بجائے یہ کام سیاسی جماعتوں پر ہی چھوڑے کیونکہ عدالت عظمیٰ کے فیصلوں پر عملدرآمد نہ ہو تو پوری قوم کی سبکی ہوگی۔
ان کا کہنا تھا کہ غلطیاں سب نے کی ہیں، خود پی ٹی آئی کو بھی احساس ہوا ہے، اس نے خود اسمبلیوں کو ختم کیا ہے۔ سیاستدانوں کو دل بڑا کرنے کی ضرورت ہے۔ معاملات کنٹرول سے باہر نہیں ہوئے امید ہے جلد حل ہو جائیں گے۔
امیر جماعت اسلامی نے کہا کہ موجودہ صورتحال میں غریب اور عوام کا نقصان ہو رہا ہے۔ آپس میں لڑنے اور فساد برپا کرنے سے انارکی مزید پھیلے گی، ہم نہیں چاہتے کہ ملک میں سیاسی قوتیں آپس میں لڑیں، ہم چاہتے ہیں کہ ملک اور غریب بچ جائے۔
سراج الحق نے کہا کہ حکومت خود بھی کہہ رہی ہے کہ مذاکرات کےسوا کوئی حل نہیں۔ حکومت نے چیئرمین سینیٹ اور اسپیکر کو شامل کرنے کی کوشش کی ہے۔ مذاکرات میں جلدی کے بجائے مواقع فراہم کرنے چاہئیں۔ اس کے لیے انا کے اسپیڈ بریکر کو توڑنا پڑے گا جو رکاوٹ بنا ہوا ہے۔
