لاہور : پی ٹی آئی کے صدر اور سابق وزیراعلیٰ پنجاب چوہدری پرویز الہی کی گرفتاری کیلئے پولیس ان کے گھر کا مرکزی دروازہ توڑ کر گھر میں داخل ہوگئی، پولیس نے خاتون سمیت 11افراد کو حراست میں لے لیا۔
پولیس اہلکاروں نے بکتر بند گاڑی کی ٹکر سے میں گیٹ کو توڑا اور بکتر بند سمیت گھر میں داخل ہوکر گھر کےاندر موجود افراد کو گرفتارکرناشروع کردیا، گھر کے اندرونی دروازے اور شیشے بھی توڑ دیے گئے۔
اس سے قبل پولیس اہلکاروں کی جانب سے پرویزالٰہی کے گھر کا گیٹ توڑنے کی کوشش کی گئی اور ناکامی پر اہلکار دیوار پھلانگ کر گھر میں داخل ہوگئے تھے۔
اس دوران پرویزالٰہی کے گھر کے اندر سے پولیس اہلکاروں پر پتھراؤ کیا گیا جس کے بعد پولیس اہلکار پیچھے ہٹ گئے، اس موقع پر اینٹی رائٹ فورس اہلکار اور ویمن پولیس کی نفری بھی موجود تھی۔
پولیس کی جانب سے پرویزالٰہی کے گھر کا مین گیٹ توڑنے کی کوشش کی گئی جبکہ گھر کے اندر سے پولیس اہلکاروں پر پانی بھی پھینکا جاتارہا۔
اسی ہنگامہ آرائی کے دوران چوہدری پرویزالٰہی کے گھر کے مین گیٹ کو آگ لگ گئی، پولیس حکام نے صورتحال کو قابو کرنے کیلئے پولیس کی مزید نفری طلب کرلی۔
پولیس اہلکاروں کی جانب سے گیٹ پر پتھراؤ بھی کیا گیا اور اسی دوران گھر کے اندر بھی پتھر پھینکے جاتے رہے، بعد ازاں بکتر بند گاڑی کی مدد سے پرویزالٰہی کے گھر کا گیٹ توڑ دیا گیا، پولیس دوبارہ بکتر بند گاڑی سمیت پرویزالٰہی کے گھر میں داخل ہوگئی۔
پولیس اہلکاروں نے گھر کا مین گیٹ بکتربند گاڑی سے توڑنے کے بعد گھر کا اندرونی دروازہ بھی توڑدیا، پولیس اہلکاروں نے گھر میں موجود ملازمین پر تشدد کیا اور پرویزالٰہی کے گھر سے خاتون سمیت11افراد کوحراست میں لے لیا۔
اس موقع پر پولیس کی بھاری نفری پرویزالٰہی کے گھر کے اندر موجود ہے جبکہ اینٹی رائٹ فورس اور پولیس کے اہلکاروں کی بڑی تعداد گھر کے باہر بھی موجود ہے۔
ذرائع کا کہنا ہے کہ ہے کہ پولیس سابق وزیر اعلیٰ پنجاب کو گوجرانوالہ میں درج مقدمے میں گرفتار کرنے کی کوشش کر رہی ہے، جبکہ ان کے وکیل کے مطابق پرویز الہی کو مذکورہ مقدمے میں ضمانت دی جا چکی ہے۔
قبل ازیں پرویزالٰہی کے وکیل عامر سعید راں نے میڈیا سے گفتگو کرتے ہوئے کہا کہ جسٹس طارق سلیم شیخ نے 6 مئی تک ضمانت قبل از گرفتاری دی ہے،ہائی کورٹ کا تصدیق شدہ آرڈر ہمیشہ اگلے دن ملتا ہے، ہم نے ان کی کورٹ کے اہلکار سے بات بھی کروا دی تھی۔
مزید پڑھیں : اینٹی کرپشن کی ٹیم پرویز الہی کی گرفتاری کیلئے پہنچ گئی
انہوں نے اینٹی کرپشن ٹیم سے کہا کہ چوہدری پرویزالٰہی گھر میں موجود نہیں ہیں، سرچ وارنٹ ہیں تو گھر داخل ہو ں ورنہ اندر نہیں جاسکتے۔
یہ مقدمہ گوجرانوالہ میں درج ہوا، پراسیکیوٹر جنرل کی موجودگی میں ضمانت ہوئی تھی، کورٹ آرڈر کے بعد وکیل کے لیٹرہیڈ پر تفصیل جاری ہوتی ہے، اینٹی کرپشن ٹیم کہتی ہے کہ ہم نے پرویزالٰہی کو ہر صورت گرفتار کرنا ہے، اینٹی کرپشن کی جانب سے قانون کو نہیں مانا جارہا۔
