کراچی : بیرون ملک سے کراچی آنے والے ایک اور مسافر میں منکی پاکس وائرس کی علامات پائی گئیں، جس کے بعد اسے آئسولیشن وارڈ میں منتقل کردیا گیا۔
تفصیلات کے مطابق کراچی میں منکی پاکس کا ایک اور مشتبہ کیس سامنے آگیا، مسافر اومان سے غیر ملکی ایئرلائن کے ذریعے کراچی پہنچا۔
2دنوں کے دوران کراچی ایئرپورٹ سے منکی پاکس کا دوسرامشتبہ کیس رپورٹ ہوا تاہم مشتبہ مسافر کو آئسولیشن وارڈ میں منتقل کردیا گیا ہے۔
گذشتہ روز بھی جدہ سے کراچی ایئرپورٹ آنیوالے مسافر میں منکی پاکس وائرس کی علامات پائی گئیں تھیں، جس کے بعد مسافر خرم شہزاد کو وزارت صحت حکام نے آئیسولیشن وارڈ منتقل کردیا گیا تھا۔
ذرائع نے بتایا تھا کہ مسافر غیر ملکی ایئرلائن کے ذریعے جدہ سے کراچی پہنچا، مسافر میں ایئرپورٹ پر دوران اسکریننگ منکی پاکس کی علامات تھیں تاہم منکی پاکس کی مزید تصدیق کے لئے مسافر کو آئیسولیٹ کردیا گیا تھا۔
بعد ازاں اس حوالے سے ترجمان محکمہ صحت نے اپنے بیان میں کہا تھا کہ جدہ سےآنیوالےایک مسافر کےچہرےپرچھوٹے اسپاٹ پائے گئے ، مسافر کے چہرے پر اسپاٹ کی مماثلت چکن پاکس جیسی ہے۔
یاد رہے بین الااقوامی پروازوں سے کراچی آنے والے تین مسافروں میں منکی پاکس کی تشخیص ہوئی تھی۔
منکی پاکس وائرس میں مبتلا ایک سومالی باشندہ اور دو پاکستانی شامل تھے، تینوں مسافروں کو ابتدائی کارروائی کے بعد محکمہ صحت نے بھٹائی آباد سینٹر منتقل کر دیا گیا تھا۔
بعد ازاں بیرون ملک سے کراچی آنے والے 3 مسافروں منکی پاکس کی تصدیق نہیں ہوئی، رپورٹس منفی آنے پر انھیں گھر جانے کی اجازت دے دی گئی تھی۔
