اسلام آباد : وزیر مذہبی امور طلحہ محمود نے ڈاکٹر فوزیہ صدیق کو ان کی بہن عافیہ صدیقی کی رہائی کیلئے ہر ممکن تعاون کی یقین دہانی کرادی۔
تفصیلات کے مطابق وزیر مذہبی امور طلحہ محمود سے ڈاکٹر فوزیہ صدیقی کی ملاقات ہوئی، ملاقات میں ڈاکٹر عافیہ صدیقی کے امریکی وکیل کلائیو اسٹیفورڈ اسمتھ ،سینیٹر مشتاق احمد خان ، چیئرمین پاسبان ڈیموکریٹک پارٹی الطاف شکور اور دیگر بھی موجود تھے۔
وزیر مذہبی امور نے عافیہ صدیقی کی رہائی کے حوالے سے کوششوں سے آگاہ کیا اور عافیہ صدیقی کی رہائی کیلئے ہر ممکن تعاون کی یقین دہانی کرائی۔
یاد رہے مارچ میں وزیراعظم شہبازشریف سے ڈاکٹر عافیہ صدیقی کی بہن ڈاکٹر فوزیہ صدیقی کی ملاقات ہوئی تھی، ملاقات میں ڈاکٹر فوزیہ نےحکومت کی جانب سے ڈاکٹر عافیہ کی بہبود کیلئے اقدامات کو سراہتے ہوئے ڈاکٹر عافیہ نے جلد رہائی کیلئے کوششوں کو بڑھانے کی درخواست کی۔
وزیراعظم شہباز شریف نے ڈاکٹر فوزیہ کو حکومت کی جانب سے مکمل تعاون کا یقین دلایا تھا۔
