کراچی: شہر قائد سمیت سندھ کے 24 اضلاع میں ضمنی بلدیاتی الیکشن کے لیے پولنگ کا وقت شروع ہو گیا ہے۔
تفصیلات کے مطابق کراچی کا میئر کون ہوگا؟ فیصلہ 11 یوسیز کریں گی، ضمنی بلدیاتی الیکشن کے لیے گیارہ یونین کونسلز اور 15 وارڈز کی نشستوں پر پولنگ کا وقت شروع ہو گیا ہے، ووٹنگ کا عمل شام پانچ بجے تک بلا تعطل جاری رہے گا۔
پاکستان پیپلز پارٹی، جماعت اسلامی، پی ٹی آئی اور دیگر سیاسی جماعتوں کے اور آزاد امیدوار میدان میں مد مقابل ہیں۔
کراچی کے 7 اضلاع میں مجموعی طور پر 168 پولنگ اسٹیشنز انتہائی حساس قرار دیے گئے ہیں، انتہائی حساس پولنگ اسٹیشنز میں سی سی ٹی وی کیمرے بھی نصب کر دیے گئے ہیں۔
ترجمان پولیس کے مطابق کراچی میں 302 پولنگ اسٹیشنز پر 7 ہزار سے زائد اہل کار سیکیورٹی کے فرائض انجام دے رہے ہیں۔
انتہائی حساس پولنگ اسٹیشنز پر 12 اور حساس پولنگ اسٹیشنز پر 10 اہلکار تعینات ہیں، پولنگ بلڈنگز پر کیو آر ایف دستے تعینات اور ریپڈ رسپانس فورس پیٹرولنگ پر مامور ہیں، حساس پولنگ اسٹیشنز پر رینجرز اہلکار بھی تعینات ہیں۔
حافظ نعیم الرحمان کہتے ہیں کہ سندھ حکومت سرکاری مشینری استعمال کر رہی ہے، ہمارے پولنگ ایجنٹوں کو روکا گیا، پولیس کا استعمال ہوا تو جو ہو گا ہم ذمہ دار نہیں ہوں گے، پندرہ سال سے پی پی نے کراچی میں کام نہیں کیا، الیکشن قریب آئے تو کام شروع کرا دیا۔ صوبائی وزیر سعید غنی کہتے ہیں کہ ابھی انتخابات ہوئے نہیں، حافظ نعیم نے شور مچانا شروع کر دیا ہے، پیپلز پارٹی کی پوزیشن مضبوط ہے، تمام گیارہ یوسیز میں جیتیں گے۔
