کراچی : مائی کلاچی پھاٹک کے قریب سمندر میں ماں بیٹا ڈوب کر جاں بحق ہوگئے، امدادی ٹیموں کے مطابق ٹرین سے بچنے کیلئے سمندر میں چھلانگ لگادی تھی۔
تفصیلات کے مطابق کراچی کے علاقے مائی کلاچی پھاٹک کے قریب ایک خاتون نے اپنے بچے سمیت سمندر میں چھلانگ لگادی، واقعے کی اطلاع ملتے ہی ریسکیو ٹیموں نے جائے وقوعہ پر پہنچ کر ڈوبنے والوں کی تلاش شروع کردی۔
ایدھی سینٹر کی بحری خدمات کی ٹیم نے جائے وقوعہ پر جاکر امدادی کام کا آغاز کیا، جنہوں نے بتایا کہ مائی کلاچی پھاٹک کے قریب سمندر میں ڈوبنے والے دونوں ماں بیٹا اور شیریں جناح کالونی کے رہائشی تھے۔
ریسکیو ذرائع کے مطابق دونوں ماں بیٹا پھاٹک کے راستے پیدل شیریں جناح کالونی جارہے تھے کہ سامنے سے آنے والی مال گاڑی کی آواز سن کر ایک طرف ہوئے اور بد حواسی میں سمندر میں چھلانگ لگا دی۔
ریسکیو حکام کے مطابق آپریشن میں سمندر میں ڈوبنے والی ماں اور بچے کی لاشیں نکال لیں گئیں ہیں، ریسکیو کے مطابق ڈوب کر جاں بحق ہونے والے بچے کی شناخت یوسف کے نام سے ہوئی ہے۔
