گوگل میپس استعمال کرنے والے صارفین کے لیے اچھی خبر ہے کہ اب ایمرسیو ویو کا پہلے سے زیادہ بہتر فیچر متعارف کروایا جارہا ہے۔
گوگل کی جانب سے اسے ’ایمرسیو ویو فار روٹس‘ کا نام دیا گیا ہے جس کا اعلان کمپنی کی سالانہ ڈیولپر کانفرنس کے موقع پر کیا گیا۔
اس فیچر سے صارفین کے لیے مطلوبہ منزل تک جانے کا راستہ سمجھنا مزید آسان ہوجائے گا۔
اس فیچر میں کسی راستے کو برڈ آئی ویو سے دیکھا جاسکے گا تاکہ صارف اس کے آس پاس کے معروف مقامات یا عمارات کو بہتر طریقے سے جان سکے۔
یہ فیچر میپس کے ذریعے نیوی گیشن کے تجربے کو بدل دے گا تاہم صارفین کو اس کے لیے کچھ انتظار کرنا ہوگا۔ اس فیچر کو پہلے گوگل میپس کی موبائل ایپس کے لیے متعارف کرایا جائے گا۔
گوگل کی جانب سے ٹریفک کی تفصیلات بھی فراہم کی جائیں گی تاکہ لوگ اس کے مطابق سفر کر سکیں اور اس فیچر کو پیدل چلتے، گاڑی چلاتے یا سائیکل پر سفر کرتے ہوئے بھی استعمال کرنا ممکن ہوگا۔
یہ بنیادی طور پر گوگل میپس میں گزشتہ سال متعارف کرائے گئے ایمرسیو ویو فیچر پر مبنی ہے مگر اس سے مخصوص مقامات کی بجائے پورے شہر کا 3 ڈی جائزہ لینا ممکن ہو جائے گا۔
