کراچی: صوبہ سندھ کے دارالحکومت کراچی میں کچی آبادی کے ایک گھر سے گٹکا بنانے والا کارخانہ پکڑا گیا، چھاپے کے دوران ملزمان فرار ہونے میں کامیاب رہے۔
تفصیلات کے مطابق انسپکٹر جنرل (آئی جی) سندھ کی خصوصی ٹاسک فورس نے کراچی کے علاقے سچل میں چھاپہ مارا، چھاپے کے دوران گھر میں گٹکا بنانے والا چھوٹا کارخانہ پکڑا گیا۔
کارخانے سے 25 من گٹکا برآمد کیا گیا ہے۔
پولیس نے ملزمان کے خلاف مقدمہ درج کرلیا ہے جس کے متن کے مطابق حاجی رمضان گبول گوٹھ کی کچی آبادی میں منظم کام کیا جا رہا تھا، گٹکے میں نشہ آور کیمیکل کا استعمال کیا جارہا تھا۔
مقدمے کے متن میں کہا گیا ہے کہ پولیس کو دیکھ کر 3 اہم ملزمان سمیت 8 فرار ہوگئے جبکہ ایک ملزم تاج محمد کو گرفتار کرلیا گیا۔
پولیس کا کہنا ہے کہ گرفتار ملزم کی جانب سے اہم انکشافات کیے گئے ہیں۔ ملزم نے بتایا کہ گٹکے کا منظم کاروبار طاہر برفت نامی ملزم کر رہا تھا، مفرور طاہر برفت سمیت 3 ملزمان کا تعلق سیاسی پارٹی سے ہے۔
گرفتار ملزم کے مطابق طاہر برفت کے ساتھی زبیر، نور نبی، جہانزیب، مہتاب بلادی، غلام حسین بلادی اور ندیم عباسی عابد عرف مارشل منظم کاروبار میں شامل ہیں۔
