امریکی گلوکار نک جونس کا کہنا ہے کہ بھارت میں انہیں ’جیجو‘ اور ’نکوا‘ بلایا جانا بہت اچھا لگا، انہیں بھارت آ کر ہمیشہ بہت اچھا لگتا ہے۔
معروف بھارتی اداکارہ پریانکا چوپڑا اور ان کے شوہر امریکی گلوکار نک جونس چند روز قبل بھارت آئے تھے۔
دونوں نے نیتا مکیش امبانی کلچرل سینٹر کی افتتاحی تقریب میں شرکت کی تھی جہاں ان سمیت ڈھیروں مشہور شخصیات شریک ہوئی تھیں۔
اس موقع پر فوٹو سیشن کی ویڈیوز بہت وائرل ہوئی تھیں جن میں بھارتی پاپا رازی غیر ملکی فنکاروں کو غلط سلط ناموں سے بلا رہے تھے۔
فوٹو گرافرز نک جونس کو جیجو کہہ کر مخاطب کر رہے تھے جو بہنوئی کے لیے ایک زبان زد عام لفظ ہے، ایک فوٹوگرافر نے انہیں نکوا بھی پکارا تھا۔
View this post on Instagram
یہ ویڈیوز دنیا بھر میں وائرل ہوئی تھیں اور لوگوں کے ہنسنے کا سبب بنی تھیں۔
اب نک جونس نے ان نیک نیمز پر اپنے ردعمل کا اظہار کیا ہے، بی بی سی ایشین نیٹ ورک کے ساتھ اپنے انٹرویو میں نک کا کہنا تھا کہ وہ بہت عرصے بعد بھارت آئے تھے اور ہمیشہ کی طرح انہیں بہت مزہ آیا۔
گلوکار کا کہنا تھا کہ انہیں اپنے نک نیمز سن کر بہت خوشی ہوئی اور وہ ان سے بہت لطف اندوز ہوئے۔
یاد رہے کہ پریانکا چوپڑا دسمبر 2018 میں نک جونس سے رشتہ ازدواج میں منسلک ہوئی تھیں اور اس کے بعد امریکا منتقل ہوگئی تھیں، دونوں کی ایک بیٹی مالتی بھی ہے۔
