کرکٹ سے لطف اندوز ہونے کے لیے گھنٹوں ٹی وی سے چپکے رہنا اب ماضی کا حصہ بن گیا ہے کیونکہ شائقین کرکٹ اب دوسری جانب متوجہ ہوگئے ہیں۔
سروے رپورٹ کے مطابق ٹی وی کے بجائے موبائل فون پر کرکٹ سے لطف اندوز ہونے والوں کی تعداد میں نمایاں اضافہ ہوا ہے، سروے کمپنی ڈیٹا اے آئی کی رپورٹ میں بتایا گیا ہے کہ آئی پی ایل کے موجودہ سیزن میں 15 اپریل سے 5 مئی تک 93 ملین ناظرین نے ٹی وی کے بجائے جبکہ موبائل فون پر میچ دیکھنے والوں کی تعداد 97 ملین سے تجاوز کرگئی ہے۔
تاہم سروے میں دو سے 14 سال کی عمر کے بچوں کا ڈیجیٹل ڈیٹا شامل نہیں کیا گیا ہے اگر دو سال زائد عمر کے افراد کا ڈیٹا شامل کیا جائے تو یہ تعداد ٹی وی دیکھنے والوں کی تعداد سے کہیں زیادہ ہوسکتی ہے۔
سروے کے مطابق ٹی وی پر آئی پی ایل دیکھنے والوں کا 23 فیصد حصہ 2 سے 14 سال کے گروپ کا ہے جبکہ 15 سے 21 سال کی عمر کے افراد میں صرف 15 فیصد ہی ٹی وی پر میچ دیکھتے ہیں۔
سروے میں بتایا گیا ہے کہ موبائل فون پر میچ دیکھنے کے جنون نے ٹی وی پر دکھائے جانے والے اشتہارات کو بھی متاثر کیا ہے اور ٹی وی پر دکھائے جانے والے اشتہارات میں 40 فیصد کمی آئی ہے۔
آئی پی ایل کے گزشتہ سیزن میں 98 مشتہرین تھے جبکہ رواں سیزن میں یہ تعداد کم ہوکر 59 رہ گئی ہے۔
دوسری جانب ڈیجیٹل پر اشتہارات دینے والوں کی تعداد 400 کے لگ بھگ ہے اور ویور شپ کے لحاظ سے ٹیلی ویژن اس آئی پی ایل سیزن میں 4.46 کی ٹی وی آر پر ہے۔
