لکھنؤ: ڈاکٹروں نے مشہور شاعر منور رانا کے لیے آئندہ 72 گھنٹے اہم قرار دے دیے ہیں۔
تفصیلات کے مطابق بھارت سے تعلق رکھنے والے مشہور شاعر منور رانا کی طبیعت اچانک بگڑ گئی ہے، اور انھیں آئی سی یو میں داخل کیا گیا ہے۔
صاحب زادی سمیہ رانا نے ایک ویڈیو پیغام میں اطلاع دی کہ لکھنؤ کے اپالو اسپتال میں زیر علاج منور رانا کی حالت کے بارے میں ڈاکٹروں نے آئندہ 72 گھنٹوں کو اہم قرار دیا ہے، انھیں وینٹی لیٹر کی سپورٹ پر رکھا گیا ہے۔
سمیہ رانا نے کہا کہ ان کے والد کی طبیعت کافی دنوں سے خراب چل رہی ہے لیکن اب حالت زیادہ بگڑنے پر انھیں اسپتال میں داخل کرایا گیا ہے، انھوں نے لوگوں سے والد کی جلد صحت یابی کے لیے دعا کرنے کی درخواست کی۔
یاد رہے کہ ایک سال قبل بھی منور رانا کی طبیعت خراب ہو گئی تھی اور انھیں علاج کے لیے لکھنؤ کے پی جی آئی میں داخل کرانا پڑا تھا، منور رانا گردے کی تکلیف کے باعث ڈائیلاسز پر تھے۔
