لاہور: نگراں وزیر اعلیٰ پنجاب محسن نقوی کا کہنا ہے کہ جب تک 9 مئی واقعات کے تمام ذمہ داروں کو پکڑ نہ لیں کوئی اور کام نہیں کریں گے۔
نگراں وزیر اعلیٰ محسن نقوی نے کہا کہ 9 مئی کے ذمہ دار آخری شرپسند کی گرفتاری تک چین سے نہیں بیٹھیں گے، پاک فوج اور انٹیلی جنس ایجنسیوں کے ساتھ مل کر شرپسندوں کو ٹریس کر رہے ہیں۔
انہوں نے کہا کہ پوری قوم آج شہدا وطن کے ساتھ اپنی بے مثال محبت کا اظہار کر رہی ہے، شہدا کی قربانیاں ہمارے لیے مشعل راہ ہیں، 9 مئی کے پرتشدد واقعات کی جتنی بھی مذمت کی جائے کم ہے، واقعات پاکستان کی تاریخ پر سیاہ داغ ہیں، شہدا کی بے مثال قربانیوں کو کبھی فراموش نہیں کر سکتے۔
ان کا کہنا تھا کہ کیپٹن اسفند یار شہید چوک یادگار کو نقصان پہنچانے والوں کو پکڑ کر دم لیں گے، فیصل آباد میں کیپٹن اسفند یار شہید چوک کو پاکستان کا یادگار چوک بنائیں گے، راولپنڈی میں شہدا کے یادگاری بورڈ تباہ کرنے والے نہیں بچ سکیں، جنہوں نے شہدا کی توہین کی وہ بدترین سزا کے مستحق ہیں۔
محسن نقوی نے کہا کہ جو قومیں اپنے شہدا کے ساتھ کھڑی ہوتی ہیں وہ ہی آگے بڑھتی ہیں، شہدا کی قدر نہ کرنے والی قومیں اقوام عالم میں سر بلند نہیں ہو سکتیں، پولیس شہدا کی فلاح و بہبود کیلیے کئی سال سے زیر التوا کیسوں کو نمٹایا ہے۔
ان خیالات کا اظہار نگراں وزیر اعلیٰ نے یوم تکریم شہدا کے موقع پر سینٹرل پولیس آفس آمد پر کیا۔ اس موقع پر انہوں نے پولیس شہدا کی یادگار پر پھول رکھے جبکہ پولیس کے چاک و چوبند دستے نے شہدا کو سلامی پیش کی۔ محسن نقوی نے پولیس شہدا کے خاندانوں سے ملاقات کی اور ان کے ساتھ یکجہتی کا اظہارکیا۔
