بھارت میں ایک سرکاری افسر کا سیلفی لیتے ہوئے موبائل ڈیم میں گر گیا تو اس کو ڈھونڈنے کے لیے ڈیم کو خالی کرا لیا گیا۔
سلیفی لینے کا شوق صرف نوعمر افراد کو ہی نہیں بلکہ اس سحر میں ہر شخص مبتلا ہے اور اس دوران بعض اوقات ہولناک تو بعض اوقات دلچسپ وناقابل یقین واقعات بھی پیش آجاتے ہیں جیسا کہ بھارت میں ہوا۔
غیر ملکی میڈیا ک مطابق یہ سلیفی کے دوران پیش آنے والا یہ واقعہ بھارت کی ریاست چھتیس گڑھ میں تعینات سرکاری اہلکار کا ہے جس کا سیلفی لیتے ہوئے موبائل فون ڈیم میں گر گیا تو اس نے اس فون کو نکالنے کے لیے پورا ڈیم ہی پانی سے خالی کرا دیا۔
رپورٹ کے مطابق 32 سالہ انسپکٹر خوراک راجیش وشواس کا ایک ہفتہ قبل سیلفی لیتے ہوئے فون کھیرکٹا ڈیم میں گر گیا تھا جسے پہلے تو غوطہ خوروں نے ڈھونڈنے کی کوشش کی لیکن ناکامی کے بعد انسپکٹر نے 21 مئی کو پورے ڈیم کو خشک کرنے کا حکم دے دیا۔
مذکورہ سرکاری افسر کے حکم کی بجا آوری کے لیے ایک موٹر پمپ خریدی گئی اور 3 دن میں ڈیم سے 21 لاکھ لیٹر سے زیادہ پانی نکال دیا۔
متعلقہ حکام نے اس حرکت کا نوٹس لے لیا اور بھارتی اہلکار کو اپنے اختیارات کے ناجائز استعمال پر معطل کر دیا گیا ہے۔
فوڈ انسپکٹر وشواس نے دعویٰ کیا ہے کہ فون میں خفیہ سرکاری معلومات تھیں۔ اس نے اپنی حرکت کا دفاع کرتے ہوئے یہ بھی کہا کہ پانی کو قریبی نہر میں نکالا گیا جس سے آس پاس کے کسانوں کو فائدہ ہو گا۔
رپورٹس کے مطابق موبائل فون کی تلاش کے لیے ضائع کیے گئے پانی سے 1500 ایکڑ تک رقبہ سیراب کیا جا سکتا تھا.
