کراچی: احتساب عدالت نے سابق وزیراعظم شاہد خاقان عباسی اور دیگر کے خلاف سابق ایم ڈی پی ایس او کی غیرقانونی تعیناتی کا ریفرنس نیب کو واپس بھیج دیا۔
تفصیلات کے مطابق کراچی کی احتساب عدالت میں ایم ڈی پی ایس او کی غیر قانونی تعیناتی ریفرنس پر سماعت ہوئی۔
سابق وزیر اعظم شاہد خاقان عباسی و دیگر ملزمان عدالت میں پیش ہوئے ، وکیل ملزمان نے بتایا کہ آرڈیننس میں ترمیم کےبعداب عدالت کوسماعت کا اختیار نہیں، ملزمان کیخلاف 50 کروڑ سے کم کی کرپشن کا الزام ہے۔
درخواست شیخ عمران الحق اور یعقوب ستار کی جانب سے دائر کی گئی، جس پر کراچی کی احتساب عدالت نے سابق ایم ڈی پی ایس او کی غیر قانونی تعیناتی ریفرنس کافیصلہ سنایا۔
احتساب عدالت نے سابق وزیراعظم شاہدخاقان عباسی اور دیگر کے خلاف ریفرنس واپس نیب کو بھیج دیا اور کہا نیب ترمیمی آرڈیننس کے بعد کیس احتساب عدالت دائرہ اختیارمیں نہیں۔
یاد رہے مئی 2020 میں سابق وزیر اعظم عباسی اور اس وقت کے پیٹرولیم سیکریٹری کے خلاف مبینہ طور پر شیخ عمران الحق کو منیجنگ ڈائریکٹر اور یعقوب ستار کو پاکستان اسٹیٹ آئل کا ڈپٹی منیجنگ ڈائریکٹر (فنانس) تعینات کرنے پر ریفرنس دائر کیا تھا۔
نیب نے ریفرنس میں الزام لگایا تھا کہ ملزمان نے قومی خزانے کو 138 ملین روپے کا نقصان پہنچایا۔
خیال رہے یہاں یہ بات قابل ذکر ہے کہ نیب متعلقہ انسداد بدعنوانی قانون میں ترمیم کے بعد 500 ملین سے کم کے کرپشن چارجز میں کارروائی نہیں کر سکتا۔
