پشاور: سیکیورٹی فورسز نے ڈی آئی خان میں کامیاب آپریشن کرتے ہوئے کالعدم تنظیم ٹی ٹی پی گنڈاپورگروپ کے اہم دہشت گرد کو ٹھکانے لگادیا۔
ترجمان سی ٹی ڈی کے مطابق سی ٹی ڈی نے سیکیورٹی فورسزاور پولیس کے ہمراہ ڈی آئی خان میں آپریشن کیا، آپریشن کے دوران مظہر نامی دہشت گرد نے پولیس پارٹی پر فائرنگ کی اور فرارہونے لگا، پولیس کی جوابی فائرنگ سے بھاگنے کی کوشش کرنے والے دہشت گرد ماراگیا۔
سی ٹی ڈی ترجمان کے مطابق دہشت گرد کاتعلق کالعدم تنظیم ٹی ٹی پی گنڈا پورگروپ سےتھا اور سی ٹی ڈی،پولیس،سیکیورٹی فورسزپرآٹھ حملوں میں مطلوب تھا، ہلاک دہشت گرد کےقبضے سےاسلحہ اوردستی بم برآمد ہوئے ہیں۔
واضح رہے کہ آج شمالی وزیرستان میں دہشت گردی کے دو واقعے رپورٹ ہوئے تھے۔
یہ بھی پڑھیں: کالعدم تنظیم کے دہشت گرد کو 3 مرتبہ سزائے موت کا حکم
پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے شمالی وزیرستان کے علاقے دوسالی میں آپریشن کے دوران دو دہشت گرد مارے گئے تھے۔
بعد ازاں شمالی وزیرستان میں پولیو ٹیم کو نشانہ بنانے کی کوشش کی گئی تھی مگر پاک فوج کے سپاہی ثاقب الرحمان نے اپنی جان کا نذرانہ دیکر قومی ڈیوٹی پر مامور عملے کو بچالیا تھا۔
