لاہور : پنجاب پولیس نے سوشل میڈیا پر9 مئی کی وائرل تصاویر اور ویڈیوز کو جھوٹا پروپیگنڈا قرار دیتے ہوئے کہا ہے کہ منظم مہم اور شہریوں کو گمراہ کرنے کی سازش تھی۔
تفصیلات کے مطابق پنجاب پولیس نے آفیشل سوشل میڈیا اکاؤنٹس پرجھوٹی تصاویر اور ویڈیوز کی حقیقت بیان کردی، پرانی تصاویر اور ویڈیوز کے اصل حقائق عوام کی آگاہی کیلئے ٹوئٹر پر جاری کردیئے۔
سماجی رابطے کی ویب سائٹ ٹوئٹر پر پنجاب پولیس کا اپنے پیغام میں کہنا ہے کہ مذکورہ تصاویر، اور ویڈیوز کئی ماہ پہلے واقعات پر مبنی ہیں جنہیں 9مئی سے جوڑ کر پروپیگنڈا کیا گیا ہے۔
پنجاب پولیس کے مطابق کے پی، سندھ میں پیش آنے والے واقعات کی تصاویر کو غلط رنگ دیکر پیش کیا گیا، اس منظم مہم کا مقصد شہریوں کو گمراہ کرکے بدنام کرنا تھا۔
ٹوئٹ میں کہا گیا ہے کہ پنجاب پولیس کے بروقت رسپانس کے باعث جھوٹا پروپیگنڈا زائل ہوگیا، جھوٹے پروپیگنڈے پرسائبر کرائم ایکٹ کے تحت کاروائی ہوگی۔
پنجاب پولیس کا کہنا ہے کہ قومی اداروں پر الزام تراشی میں ملوث شرپسندوں کو کسی صورت رعایت نہیں ملے گی، پولیس نے سوشل میڈیا پر نازیبا پوسٹ لگانے والوں کیخلاف کاروائی کیلئے ایف آئی اے سے رابطہ کیا ہے۔
سوشل میڈیا پرٹرولنگ کرنے والوں کو گرفتار کرنے کا فیصلہ کیا گیا ہے، سوشل میڈیا پرچیک لگانے کیلئے سائبر سکیورٹی ایکسپرٹس نے کام شروع کردیا، بیرون ملک سے آپریٹ ہونے والے اکاؤنٹس بلاک کرائے جائیں گے۔
