کراچی: شہر قائد کے علاقے سائٹ سپر ہائی وے میں 2 لٹیرے پولیس پارٹی کو دیکھ کر فرار ہوتے ہوئے ایک ڈمپر سے ٹکرا کر شدید زخمی ہو گئے۔
تفصیلات کے مطابق آج اتوار کی صبح کو تھانہ سائٹ سپر ہائی وے ایسٹ کراچی کی حدود میں 3 موٹر سائیکل سوار لٹیرے شہریوں سے لوٹ مار کر رہے تھے، کہ اس دوران پولیس پارٹی کو آتے دیکھ کر فرار ہونے لگے۔
ایس ایچ او انسپکٹر اورنگزیب خٹک کے مطابق تین مسلح لٹیرے تھانہ سائٹ سپر ہائی وے کے علاقے میں فرمان، ثاقب احمد اور احمد ولد سلیم سے موبائل فونز اور نقدی چھین رہے تھے، کہ اس دوران گشت کرنے والی پولیس پارٹی آ گئی۔
لٹیرے پولیس پارٹی کو دیکھ کر موٹر سائیکلوں پر سڑک کے رانگ سائیڈ سے فرار ہونے لگے، لیکن سامنے سے آنے والے ڈمپر سے بری طرح ٹکرا گئے۔
ڈمپر سے ٹکر کے نتیجے میں سیاہ رنگ کی 125 موٹر سائیکل پر سوار 20 سے 25 سال کے دو مسلح لٹیرے ریئس اللہ ولد نصیب اللہ اور شرافت ولد سید اللہ شدید زخمی ہو گئے، جب کہ ان کا تیسرا ساتھی مانی موٹر سائیکل پر فرار ہو گیا۔
پولیس حکام کے مطابق زخمی لٹیروں کی تلاشی لی گئی تو ان سے ایک ایک پستول، لوڈ میگزین، چھینے ہوئے موبائل اور نقدی برآمد ہوئی، لٹیروں کو طبی امداد دے کر مقدمات عمل میں لائے جا رہے ہیں۔
