بھارت میں موبائل فون چارجنگ پر لگاتے ہوئے ہلاکت کا واقعہ پیش آیا ہے، 12 سالہ بچی کرنٹ لگنے سے جان سے چلی گئی۔
بھارتی میڈیا کے مطابق ریاست اترپردیش میں موبائل فون کا چارجر لگاتے ہوئے 12 سالہ بچی مانسی کا ہاتھ چارجر کے چھلے ہوئے تار پر لگ گیا جس سے زوردار کرنٹ لگا اور وہ بے سدھ ہوکر گرگئی۔
رپورٹ کے مطابق مذکورہ واقعہ اترپردیش کے علاقے کھجوری کے ایک گاؤں میں پیش آیا، بچی نے غلطی سے چارجر کی ننگی تار کو چھو لیا تھا، بچی کے اہل خانہ اسے فوری طور اسپتال لے گئے تاہم دوران علاج ہی کچھ دیر میں ڈاکٹروں نے بچی کی موت کی تصدیق کردی۔
واضح رہے کہ اس سے قبل بھی اپریل 2023 میں بھارتی ریاست کیرالہ میں ایک 8 سالہ بچی موبائل فون پھٹنے سے ہلاک ہوگئی تھی۔
پولیس کے مطابق بچی کے موبائل فون استعمال کرنے کے دوران فون اس کے چہرے کے قریب پھٹ گیا، بچی کو فوری طبی امداد کے لیے اسپتال منتقل کیا گیا جہاں وہ دوران علاج چل بسی۔
