جے پور: بھارتی ریاست راجستھان میں دولھوں، دلہنوں نے اجتماعی شادی کا گنیز ورلڈ ریکارڈ توڑ دیا۔
تفصیلات کے مطابق 12 گھنٹوں میں 2 ہزار 413 شادیوں کا نیا عالمی ریکارڈ بن گیا ہے، یہ ریکارڈ بھارتی ریاست راجستھان میں ایک انوکھی اجتماعی شادی کی تقریب میں بنا، جہاں محض ایک دن میں دو ہزار سے زائد جوڑے شادی کے بندھن میں بندھے۔
اجتماعی شادیوں کا اہتمام ایک مقامی ٹرسٹ نے کیا، جس کا مقصد پس ماندہ افراد کی شادی میں مدد کرنا تھا، گنیز ورلڈ ریکارڈ کے مطابق 26 مئی کو 2 ہزار 413 جوڑوں نے مخصوص مقام پر جمع ہو کر چھ گھنٹے سے بھی کم وقت میں شادی کی رسمیں ادا کیں۔
گینز ورلڈ ریکارڈز کے مطابق اس سے قبل سب سے زیادہ شادیوں کا ریکارڈ 2013 میں یمن میں بنا تھا جس میں 963 یمنی جوڑوں نے شادی کی تھی۔
راجستھان میں اجتماعی شادیوں میں مسلمان اور ہندو دونوں مذاہب کے جوڑے شریک ہوئے، ہندو جوڑوں کے لیے متعلقہ برادریوں کے اہل پجاری جب کہ مسلم جوڑوں کے لیے مسلمان قاضیوں کو قریبی علاقوں سے مدعو کیا گیا تھا۔
Couples in Rajasthan tied the knot in a mass ceremony.https://t.co/ZCTNixcCem
— Guinness World Records (@GWR) June 10, 2023
شادی کی تمام رسومات مکمل ہونے کے بعد ہر جوڑے نے حکومتی نمائندوں سے نکاح نامہ وصول کیا، جس کے بعدان نوبیاہتا جوڑوں میں تحائف تقسیم کیے گئے، اور مہمانوں کو کھانا کھلایا گیا۔
تحائف میں ضروریات زندگی کا سامان جیسا کہ بستر، برتن دیگر گھریلو سامان جیسا کہ ٹی وی، ریفریجریٹر، کولر اور دلہن کے زیورات، غیرہ شامل تھے۔