کراچی : میئر کراچی کے انتخاب کے لئے پی ٹی آئی کے یوسی چیئرمینوں اور جماعت اسلامی میں اختلافات شدت اختیار کرگئے۔
تفصیلات کے مطابق پی ٹی آئی کے30 سے زائد چیئرمین اور وائس چیئرمینوں کا اجلاس کراچی میں ہوا جس میں یو سی چیئرمینوں نے میئر کراچی کے لئے حافظ نعیم الرحمان کو ووٹ نہ دینے اعلان کیا۔
پی ٹی آئی کے30 چیئرمینوں کے ہونے والے اجلاس میں فیصلہ کیا گیا ہے کہ میئر کراچی کے انتخابی عمل کا حصہ نہیں بنیں گے، ان کا کہنا ہے کہ پولنگ والے دن پی ٹی آئی یوسی چیئرمین غیرحاضر رہیں گے۔
یوسی چیئرمینوں کا کہنا ہے کہ کراچی کے زمینی حقائق ہم جانتے ہیں، منتخب نمائندے ہیں آزادانہ فیصلے کرنے کا حق رکھتے ہیں، کراچی کی مقامی قیادت نے مشاورت کیے بغیر فیصلے کئے۔
ان کا کہنا تھا کہ پی ٹی آئی کراچی ڈویژن کے عہدیداران سے ناراض ہیں، پی ٹی آئی کی مقامی قیادت کے کسی فیصلے کو نہیں مانتے، جماعت اسلامی نے موجودہ حالات سے فائدہ اٹھایا ہے۔
چیئرمینوں نے کہا کہ جماعت اسلامی نے مخصوص نشستوں پر اپنے لوگوں کو منتخب کرایا، ہم کسی قسم کے دباؤ میں ہیں نہ ہی کسی دباؤ میں آئیں گے۔
یاد رہے کہ آج دوپہر صوبائی وزیر سعید غنی نے ایک پریس کانفرنس میں گفتگو کرتے ہوئے کہا تھا کہ سمندری طوفان نہ آیا تو 15 جون کی رات سی وی یو پرجشن منائیں گے۔
انہوں نے کہا کہ کل سے رونے دھونے کاسلسلہ شروع ہے، سراج الحق کو بھی تعزیتی پروگرام میں بلایاگیا، 9مئی کے واقعات کی مذمت بھی ہورہی ہے اور کارروائی کامطالبہ بھی، ان کو لگتا ہے کہ پی ٹی آئی رہنماؤں کی گرفتاری میئر بننے سے روکنے کیلئے ہے، پی ٹی آئی کے یوسی چیئرمینز نے9مئی سے پہلے ہی ووٹ نہ دینے کا اعلان کیا تھا۔
سعید غنی کا کہنا تھا کہ جماعت اسلامی کونفرت،منافرت،لسانیت کی سیاست نہیں کرنی چاہئے ، آپ کے اپنے لوگ حافظ نعیم اور جماعت کی سیاست سے نالاں ہیں، دعوے سے کہتا ہوں 155میں سے ایک آدمی بھی ادھرادھر نہیں ہوگا۔
