کراچی: اس سوال پر کہ آج کل کس شہر میں سب سے زیادہ غیر قانونی مویشی منڈیاں لگ رہی ہیں، آپ کے ذہن میں یقیناً شہرِ کراچی کا نام آئے گا، جی ہاں، نیو کراچی کے رہائشی غیر قانونی مویشی منڈی کے خلاف عدالت جا پہنچے۔
اے آر وائی نیوز کے مطابق غیر قانونی مویشی منڈیوں سے تنگ کراچی کے شہریوں نے مسئلے کا حل تلاش کرنا شروع کر دیا ہے، نیو کراچی کے علاقہ مکینوں نے اپنی مدد آپ کے تحت علاقے میں موجود غیر قانونی مویشی منڈی کے خلاف عدالت سے رجوع کر لیا ہے۔ اس سلسلے میں سندھ ہائیکورٹ کی جانب سے ڈی سی سینٹرل، پولیس اور دیگر اداروں سے جواب طلب کر لیا گیا ہے۔
کیس کی سماعت کے دوران کھیل کے میدان پر غیر قانونی مویشی منڈی قائم کرنے پر عدالت نے حیرت کا اظہار کیا اور مویشی منڈی کے آرگنائزر ارشد قریشی کو بھی پیش ہونے کا حکم دیا۔ جسٹس یوسف سعید نے استفسار کیا کہ کیا کسی ادارے نے مویشی منڈی کا نوٹیفکیشن جاری کیا ہے؟
واضح رہے کہ عید قرباں کا موسم آتے ہی کراچی کے مختلف پلے گراؤنڈز اور پارکس کے ساتھ ساتھ کئی علاقوں کی مرکزی شاہراہوں پر بھی غیر قانونی مویشی منڈیاں قائم کر لی جاتی ہیں۔ ان منڈیوں کے باعث نہ صرف وہاں کے رہائشی مستقبل عذاب میں منبتلا رہتے ہیں بلکہ وہاں سے گزرنے والے لوگوں اور گاڑیوں کو بھی شدید ٹریفک جام کے مسائل کا سامنا کرنا پڑتا ہے۔
