کراچی: شہر قائد کے علاقے لانڈھی میں ایک فیملی پارک میں 2 گروپوں میں جھگڑا ہونے کے بعد مسلح افراد نے علاقے میں فائرنگ کر کے خوف و ہراس پھیلا دیا۔
تفصیلات کے مطابق کراچی کے علاقے لانڈھی نمبر چار زمان آباد میں فیملی پارک میں دو گروپوں میں تصادم ہوا، تصادم کے دوران نامعلوم افراد کی جانب سے فائرنگ بھی کی گئی جب کہ جھگڑے میں مسلح افراد کی فائرنگ کرنے کی سی سی ٹی وی فوٹیج اے آر وائی نیوز نے حاصل کر لی۔
فوٹیج میں مسلح ملزمان کو توڑ پھوڑ اور فائرنگ کرتے ہوئے واضح دیکھا گیا، فائرنگ کے باعث علاقے میں خوف و ہراس پھیل گیا، فائرنگ کے دوران شہری جان بچانے کے لیے بھاگتے رہے، مسلح افراد فائرنگ اور توڑ پھوڑ کر کے بہ آسانی فرار ہو گئے۔
مسلح افراد نے گلی میں کھڑی موٹر سائیکلوں کو بھی نقصان پہنچایا، پولیس کے مطابق کچھ لڑکے پارک میں داخل ہونے کی کوشش کر رہے تھے، لیکن فیملی پارک میں داخلہ نہ ملنے پر جھگڑا شروع ہو گیا۔ واقعے کی سی سی ٹی فوٹیج موجود ہونے کے باوجود لانڈھی پولیس فائرنگ کرنے والے مسلح افراد کو گرفتار کرنے میں ناکام ہے۔
