اسلام آباد : وزیر خزانہ اسحاق ڈار نے امریکی سفیر ڈونلڈ بلوم کوآئی ایم ایف کیساتھ اسٹاف لیول معاہدے پر کامیابی سے پہنچنے سےمتعلق آگاہ کرتے ہوئے معاہدے میں کردارادا کرنے پر شکریہ ادا کیا۔
تفصیلات کے مطابق وزیرِ خزانہ اسحاق ڈارسے پاکستان میں امریکی سفیر ڈونلڈ بلوم کی ملاقات ہوئی ، ملاقات میں باہمی دلچسپی کے امورپر تبادلہ خیال کیا گیا اور دو طرفہ سرمایہ کاری ،تجارتی تعلقات بڑھانے پربھی گفتگو کی گئی۔
وزیرخزانہ نے امریکی سفیر کو آئی ایم ایف سے9ویں جائزے پر پیشرفت سے آگاہ کرتے ہوئے بتایا کہ پاکستان اسٹاف لیول کے معاہدے پر کامیابی سے پہنچ گیا ہے۔
اسحاق ڈار نے امریکی سفیر کو معاشی ترقی کیلئے حکومتی اقدامات سے بھی آگاہ کیا اور آئی ایم ایف معاہدے میں کردار ادا کرنے پرامریکی سفیر کا شکریہ ادا کیا۔
ملاقات کے اعلامیے میں کہا گیا اسحاق ڈار نے اقتصادی،تجارتی شعبوں میں امریکا کے ساتھ مضبوط تاریخی اورپائیداردوطرفہ تعلقات کوسراہا۔
اعلامیے کے مطابق وزیرخزانہ نے امریکی سفیرکوآئی ایم ایف کیساتھ اسٹاف لیول معاہدےپرکامیابی سےپہنچنےسےمتعلق آگاہ کرتے ہوئے ملکی استحکام اورترقی کے لیےحکومت کی اقتصادی پالیسیوں اورترجیحات کے بارے میں بتایا۔
امریکی سفیر ڈونلڈبلوم نے ملک میں معاشی استحکام لانے کے لیےحکومت کی پالیسیوں پر اعتماد کا اظہار کرتے ہوئے دوطرفہ اقتصادی، سرمایہ کاری اور تجارتی تعلقات کومزید فروغ دینے کیلئے حمایت کا یقین دلایا۔
