کراچی: شہر قائد کے علاقے محمود آباد اعظم بستی میں فائرنگ سے ایک شخص جاں بحق اور دوسرا زخمی ہوگیا۔
پولیس کے مطابق کراچی کے علاقے محمود آباد اعظم بستی گلی نمبر 12 میں فائرنگ کا واقعہ پیش آیا ہے، واقعےکی سی سی ٹی وی فوٹیج اے آر وائی نیوز نے حاصل کرلی۔
سی سی ٹی وی ویڈیو میں موٹر سائیکل سوار ملزمان نے کار سوار ٹارگٹ کا تعاقب کیا، کار گلی میں پہنچ کر رکی، کار سوار کے نیچے اترتے ہی ایک ملزم نے فائرنگ کر دی۔
دو موٹر سائیکل سوار ملزمان کو کار سے اترنے والے شخص پر اندھا دھند فائرنگ کرتے دیکھا جاسکتا ہے، ملزمان نے کار کے ڈرائیور پر بھی فائرنگ کی جس سے وہ کندھے پر گولی لگنے سے زخمی ہوا، موٹر سائیکل سوار مسلح ملزمان واردات کے بعد فرار ہوگئے۔
پولس کا اس حوالے سے کہنا ہے کہ فائرنگ کا واقعہ ٹارگٹ کلنگ کا شاخسانہ ہے، جائے وقوعہ سے گولیوں کے خول اور شواہد اکٹھے کرلئے گئے۔
پولیس حکام کا کہنا ہے کہ اطراف کی سی سی ٹی وی فوٹیج حاصل کی جارہی ہے، فائرنگ واقعہ کی ہر پہلو سے تحقیقات کی جارہی ہے۔
