لاہور: لاہور میں 14 سالہ لڑکے کو کرنٹ لگا کر قتل کر دیا گیا، مقتول گھر سے آم لینے نکلا تھا۔
تفصیلات کے مطابق لاہور کے علاقے تھانہ ڈیفنس سی کی حدود باؤ والا میں مبینہ طور پر عثمان نامی لڑکے کو کرنٹ لگا کر قتل کر دیا گیا۔
پولیس حکام کے مطابق پوسٹ مارٹم رپورٹ 24 گھنٹوں میں موصول ہو جائے گی، اور قتل سے حقائق بھی سامنے آ جائیں گے، پولیس کا کہنا ہے کہ عثمان کو کرنٹ لگا ہے، اور جسم کے مختلف حصوں پر تشدد کے نشانات بھی پائے گئے ہیں۔
مقتول عثمان کی والدہ نے کہا ہے کہ 14 سالہ عثمان کو نامعلوم شخص نے تشدد کا نشانہ بنایا اور کرنٹ لگا کر قتل کیا۔ 14 سالہ عثمان کی لاش گھر کے قریب مارکیٹ میں پلازہ کی چھت سے ملی تھی۔
والدہ کے مطابق قتل کا واقعہ ہفتے کے دن پیش آیا، جب عثمان گھر سے آم لینے گیا تھا اور واپس نہیں آیا۔ واضح رہے کہ قتل کا مقدمہ نامعلوم ملزم کے خلاف مقتول کے چچا صفیان علی کی مدعیت میں درج کر لیا گیا ہے۔
