لاہور: ڈاکٹر عظمیٰ خان کے خلاف کرپشن کا ایک اور مقدمہ درج ہو گیا۔
تفصیلات کے مطابق ترجمان اینٹی کرپشن نے کہا ہے کہ ڈاکٹر عظمیٰ نے جعل سازی سے کروڑوں کی اراضی غیر قانونی طور پر اپنے نام ٹرانسفر کرائی ہے، جس پر ان کے خلاف ایک اور مقدمہ درج کر لیا گیا ہے۔
ترجمان کے مطابق کیس میں 2 شریک ملزمان افضل سلیانہ نائب تحصیلدار اور اسلم خان پٹواری کو گرفتار کر لیا گیا ہے، ملزمان نے جھنگ میں 310 کنال اراضی دھوکا دہی سے ڈاکٹر عظمیٰ کے نام منتقل کی۔
ملزمان نے ریکارڈ میں رد و بدل کر کے رقبہ ڈاکٹر عظمیٰ خان کے نام منتقل کیا، اور رقبے کا اصل ریکارڈ غائب کر دیا، اینٹی کرپشن نے مشکوک انتقالات، دھوکا دہی، اور جعل سازی کے الزامات کی تحقیقات کیں تو انکوائری میں ڈاکٹر عظمیٰ و دیگر ملزمان جعل سازی میں ملوث پائے گئے۔
ترجمان کا کہنا تھا کہ اینٹی کرپشن فیصل آباد نے ڈاکٹر عظمیٰ و دیگر 8 ملزمان کے خلاف مقدمہ درج کر لیا ہے۔
